Dear Atty. Divine,
Duna koy yuta nga gusto unta nako nga i-donate sa usa ka NGO nga maoy nagtabang sa mga bata nga gi-abandon ug mga masakiton.
Single ko ug wa koy anak ug 65-anyos na ang akong pangidaron karon.
Unsay akong buhaton aron mamahimong legal ang akong pag-donate sa maong property? Daghang salamat.
Wilma
* * *
Dear Wilma,
Aron mamahimong valid ang imong pag-donate sa property, kinahanglan kini nga himoon in writing, kinahanglan sab nga notarized ug dapat adunay acceptance sa imong hatagan nga NGO. Mas maayo nga moduol ka og abogado nga maoy imong pabuhaton sa imong Deed of Donation aron pagseguro nga pinasubay gyud sa balaod ang maong dokumento.
Apan hinumdumi nga kanang Deed of Donation moepekto na dayon from the time nga mopirma sa acceptance ang imong gihatagan.
Buot ipasabot nga ang imong property mamahimo dayon kining i-transfer sa pangan sa NGO nga imong gihatagan.
Busa, sa dili pa nimo i-donate ang maong property seguroha nga aduna kay gi-reserve nga property alang kanimo ug sa imong mga galastuhan sa umaabot nga mga panahon. Thank you and God bless!
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.