Tungod ni anhing Choy Torralba, nagka-kumpare mi ni Presidente Ferdinand Marcos Jr. Iya ming gipakugos sa iyang anak niadtong higayon nga wa pay klaro makabalik ba ang mga Marcos sa Malakanyang. Giulog-ulogan mi nga gipili niya ang batan-ong mga higala isip maninoy ug maninay aron dunay makatabang pag-atiman sa iyang mga anak kon wa na siya.
Wa na si anhing Choy. Nitaliwan siya gahapon sa kadlawon. Kabilin niya ang katakos pag-abot sa mga nagkasungi og panghunahuna. Ug pagpabiling matinud-anon sa iyang mga higala bisan di na uso ang pagsuporta nila.
* * *
Dihang mga loyalista nitalikod sa mga Marcos kay napalayas sa gahom, si Choy padayong nitabang nila. Siyay nangumbinser sa mga sakop sa media sa Sugbo pag-interview sa mga Marcos sa katuigan nga way ganahang mohikap nila.
Maong siyay ilang sinaligan sa kinalisorang mga tahas sa Kabisay-an ug Mindanao. Maong di sab silang kabalibad niya. Dihang nangita mi sa Kapisanan ng mga Brodkaster ng Pilipinas Cebu Chapter og inducting officer, siyay nibira ni Marcos Jr. nganhi sa Sugbo ug nangita og dugang kalihokan nga katambongan aron nga mapuno ang biyahe.
* * *
Dihang nahibalik ang mga Marcos sa Malakanyang, gipapili nila si Choy unsay puwesto nga iyang ganahan. Pero gibalibaran niya ang tanang tanyag sa pagserbisyo sa gobyerno. Gipaagi niya og pasiaw pero way nilalis sa iyang rason: Kon ang uban di angayng magpabantang kay dunay skeletons sa ilang closet, labaw na siya nga dunay mausoleum sa mga tinagoan.
Nipasabot si Choy nako nga di siya ganahan nga maduhig ang gagmay niyang mga anak kon mautingkay ang mabulukon niyang kagahapon.
* * *
Sa Visita Iglesia sa niaging tuig taliwa sa namungingi nga campaign materials, gisultihan namong mga anak sa among higala nganong mas maayong lider si kanhi Bise Presidente Leni Robredo ug nganong mameligro ang Pilipinas kon modaog si Marcos. Dihang gikaabot namo sa paniudto si Choy, naglisod mi pagpasabot sa mga bata nganong mapahiyumon ming nakigsulti og tawo kansang pulso napuno sa BBM ballers.
Matinud-anon nga higala si Choy. Dihang wa na koy trabaho kay nasirang ABS-CBN, ug wa na siyay makuha nako, padayon siyang nanawag sa telepono. Nagsige gihapon og tawag bisan wa na ko motubag.
* * *