Usa ka adlaw niana giingnan si Monsenyor Teofilo Camomot sa usa sa iyang mga madre nga sakop sa CTOBE kun Carmelite Tertiary of the Eucharist, ang pre cursor sa Daughters of St. Teresa didto sa Mindanao, nga pipila sa iyang mga madre ang nibuwag aron maghimo og ilang kaugalingong kongregasyon. Ang bugtong tubag niya mao nga:
“Pasagdi lamang kay ingon ana gyud ang kinabuhi tingali nakakita sila og mas tam-is pa. Kun tam-is gani ang pagkaon modugok gyud niini ang mga hulmigas. Dili siya pugoso.
Ang mapailubong aura maoy nakapahimo niya nga balaanon ug mahigugmaon. Masinabtanon usab siya kaayo. Butang nga lisud gyud kaayo sundon.
Ning atong kapanahonan karon daghanan kanato ang nagpangita og loyalty gikan sa atong mga suod. Apan kining maong loyalty lisud man diay kini kab-oton labina kun mahunong o diyotay lamang ang benipisyo. Ang pagkamatinud-anon karon usahay sukdon sa madawat nga kaayo.
Apan bisan pa man kun ingon ini ang kinabuhi, padayon gihapon kita sa paghimo og maayo bisan pa man kun dili kita tam-is tagamtamon sa ubang mga tawo. kay dili tanang tam-is makapalipay, dunay tam-is nga magdala og sakit ug kamatayon.
More is not good matud pa. Mao nga dili maayo nga magpasulabi sa paghunahuna nga ang tanan molungtad hangtud sa hangtud.
Ang tanan dunay kinutoban lakip na niini ang atong kinabuhi ug bisan gani ang relasyon. Ug nindot kaayo ang gipahimangno ni Master Yoda ngadto kang Anakin Skywalker sa iyang pag-ingon: “Do not be afraid to let go those whom you love!”