Babaye nga di na kaayo batan-on dugay nga nagbarug atubangan sa tindahan nga namaligya og hiniwa nga mga bahin sa manok. Gilabay-labayan siya sa ubang mga kustomer sa silingang mga tindahan sa pagkaon. Di layo sa eskina sa Canduman Road ug nasudnong highway.
Tingkaon na. Linga ang tanang namaligya ug gipanggutom nang mamalitay. May nagpaluto og barbekyu. May nagpatakos og usa ka plastik nga linat-ang munggos. Ang uban nitudlo sa laing mga putahe. Pero ang babaye wa magdali. Hinay-hinay niyang gipang-ablihan ang mga sudlanan sa hilaw nga mga hiniwang manok.
* * *
May kuyog siyang batang babaye. Kinsa nagsige og tudlo sa sudlanan sa hiniwa nga mga paa. Pero wa niya tagda. Nagtutok siya sa laing sudlanan. Nga puno sa mga tiil sa manok. Nangutana siya sa tindera samtang nitudlo sa nagkalainlaing sudlanan. Posibleng nagpakisayod sa mga presyo.
Gitudlo niya ang sudlanan sa mga tiil. Gipaduol ang iyang dunggan sa baba sa tindera. Ug nakahukom siya. Gihatag ang iyang pitaka sa bata. Nangayo og plastik sa tindera. Gikuha ang dakong kumpit ug giablihan ang sudlanan sa mga tiil.
* * *
Way kadasig ang bata nga nikupot sa pitaka sa iyang inahan. Naguba ang iyang nawong samtang nagtan-aw sa inahan nga nitagsa-tagsa pagpunit sa mga tiil ginamit ang kumpit ug gisud sa plastik.
Nipasiplat ang bata sa sudlanan sa mga paa. Wa kapugong nga nanglad-ok. Morang kumbinsido nga mas lami ang iyang gitudlo kay sa napilian sa iyang inahan. Pero unsa may iyang mahimo?
* * *
Natunga nang plastik nga sudlanan. Pero wa pa mohunong ang inahan sa pagpunit sa mga tiil. Pila man diay silang mangaon? Nagtingob ba og palit ug anam-anamon paghikay? Mao ra bay lutuon o isubak sab?
Nausab ang suga sa trapiko. Nitan-aw ang bata sa nagsugod na pag-irog nga mga sakyanan. Nakatugkad ba sa ilang kawad-on? Makasabot ba nga mga tiil ray maabot sa kuwarta sud sa pitaka nga iyang gikuptan? Nipasiplat ang inahan sa bata. Nikisdom ang dagway pagkakita nga nagtibi ang anak. Nanghupaw. Gibalik ang kumpit sa butanganan. Gihatag sa tindera ang plastik nga puno sa mga tiil. Gikuha ang pitaka ug gihapuhap ang ulo sa bata.
* * *