Kakuyaw ba

Gikuyawan ko sa gisulti ni Edna Inocando kanako nga dunay siyudad sa Mindanao nga gi-privatize nila ang ilang water district, ug misamot hinuon ang problema nila sa tubig.

Si Inocando maoy corporate manager for communications sa Metro Cebu Water District (MCWD). Matud niya nga kon dili man gyud 100 percent ang performance sa MCWD, gikuyawan sila nga mosamot kabati ang serbisyo kon ma-privatize na unya.

Matud ni Inocando nga ang mga lumolupyo sa Malaybalay City sa Bukidnon nakasinati na hinuon og dakong problema sa tubig human nga gi-privatize ang ilang Malaybalay City Water District.

Ang rason kay wa mamaayo pagkadumala sa pribadong kompaniya ang serbisyo sa panubig, ug ang katawhan nagbagolbol na hinuon.

Bitaw no? Kuyawa gud. Kini maoy angay natong timbang-timbangon pag-ayo. Aw, hinuon, pagka karon ang mga sakop sa MCWD Board nga gipangulohan ni Atty. Joey Daluz III, supak man gyud sa privatization.

Para nako, ang serbisyo sa panubig magdepende ra gyud sa mga tawo nga adunay sinsero nga pangalagad aron makontento ang katawhan sa ilang pangalagad.

Dili sama kaniadto nga ang tsirman sa MCWD maayo kaayong motabi, tuasik lang gud ang laway, pero sa buhat wa gyud tawon. Gani, nakasinati og grabeng kanihit sa tubig ang Cebu City.

Wa sab sila mangita’g paagi nga mahatdan og tubig ang mga dapit nga nagnihit og tubig. Ako kaniadto, maghakot ko’g tubig gikan sa booster pump sa MCWD, duha ka kilometro gikan sa amo.

Ang 24 ka container, kapin sa duha ka baril nga tubig, ikarga nako sa akong sakyanan. Resulta, nabalian tawon ko’g mulye sa paghinakot og tubig .

Dihang giilisan na ang mga nagdumala sa MCWD, ug sila na si Atty. Daluz, gikontrata nila ang JE Hydro Bio-Energy Corporation aron mosuplay og tubig gikan sa sapa sa Barangay Lusaran.

Tuod man, karon mga 500 cubic meters nga tubig (250,000 ka baril) ang gisuplay sa JE Hydro ngadto sa MCWD kada oras. Sa dili madugay, mahuman na usab ang mga water desalination plants, ang tubig sa dagat himoong tab-ang.

Sa ato pa, daghan na og tinubdan sa tubig ang MCWD nga magamit sa mga konsumidor. Unya, samtang mahal-mahal ang pagpalit og tubig sa MCWD, barato ra ang ilang ipabayad sa mga konsumidor, kay agi man kini og serbisyo sa katawhan.

Diha ko nakaingon nga ang nindot nga pagserbisyo sa usa ka water district, dili kinahanglan nga himoong pribado, kondili, naa sa mga tawo nga magdumala niini ang makapanindot sa serbisyo.