Walay overtime pay

Dear Atty. Divine,

Usa ko ka trabahante sa kompaniya. Ang among production continues busa kami sad mga trabahante shifting ang trabaho ug usahay moabot og sobra sa 8 hours ang among trabaho sud sa usa ka adlaw.

Apan inig tan-aw namo sa pay slip wa may overtime pay. Makita man unta sa among timecard kun unsang orasa mi misud sa trabaho og unsang orasa mi migawas. Unsa may maayo namo nga buhaton?

Roel

* * *

Dear Roel,

Mamahimo kamo nga mopadala og suwat-reklamo ngadto sa Department of Labor and Employment (DOLE) batok sa inyong kompaniya nga wa mobayad kaninyo og overtime pay. Kay basi sa balaod walo ra ka oras dapat ang trabaho sa empleyado ug kun mosobra kini sa walo ka oras then mobayad na og overtime pay ang imong company.

Sa imong suwat sa DOLE imong idetalye ang imong reklamo ug ang pangan og address sa inyong company. Apan kun mahadlok ka nga magpaila mamahimo nga dili lang nimo itug-an ang imong pangan sa imong reklamo. Ang DOLE na ang mopahigayon og imbestigasyon ngadto sa inyong trabahoan.

Apan kun dili mo mahadlok nga mopaila, mamahimo ra nga inyo gyung atubangon ngadto sa DOLE ang inyong company aron makurihian ang ilang sayop nga mga practices. Thank you and God Bless!

Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City o email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.