Kini mao ang nahimong hilisgotan sa among monthly recollection kagahapong adlawa. Ang among sharer mao si Fr. Nelson Zerda usa ka Agustino ug kasamtangang na destino isip rector sa Basilica Minore ning atong dakybayan.
Iyang gipaambit ang sugilanon sa iyang kinabuhi ug giunsa niya paglingkawas gikan sa krisis nga iyang nahiagoman labina kadtong higayon nga nagsunod og kamatay ang mga sakop sa iyang pamilya diin katapusang namatay niadtong tungora mao man ang iyang inahan nga wala gyud makatambong sa iyang diaconate ordination. Gawas sa personal nga pag-ampo nahimong dako og ikatabang ang mga kaubanan niya sa Augustinian Order nga nihatag sa ilang suporta ngadto kaniya.
Lisud kaayo ning mga panahon karon. Bisan pa man kun nahimong duol ang matag usa diha sa social media apan malisud ang pagtugkad kun asa ang mga tawo motabang kanimo labina sa mga panahon sa imong kagul-anan ug kalisdanan.
Mahinungdanon gyud tong mga tawo nga imong kasaligan labina sa mga higayon nga kinahanglan nimong ipahungaw ang tinuod nimong gibati.
Apan ang pangutana nahimo ba kining konkreto diha atong adlaw adlaw nga kinabuhi? O nahimo ba kining mahinungdanong kabahin sa atong katilingbanong estraktura isip Simbahan? o isip sakop sa banay sa mga kaparian?
Kagahapon pud adlawa gisaulog nako ang ikanapulog-pito nga kasumaran sa ordinasyon. Walay igong pangandam ug walay kisaw.
Niinom lang ko og kape dayon basa basa sa mga balita ning atong kinaham nga mantalaan ang BANAT NEWS. Niadto ko sa siyudad aron motambong sa maong recollection.
Human niadto nipauli ko nanihapon sa simpleng pagkaon ug nanghinaut nga sa mga kalisdanan nga akong gisagubang karong mga panahona, makakita gihapon ko sa kahulogan sa kinabuhi ug nga magpadayon sa gihapon aron makaalagad sa kahitas-an. Deus Vult!