Gidili ang pag-counterflow sa tanang motorista. Pero daghang nagmotorsiklo ang wala motahod niini. Kana lang dalan sa M. Velez, eskina Banawa-V. Rama Avenue, haskang daghanang badlongon. Bisag milapas na sa linya nga nagtunga sa magkasugat nga mga sakyanan, motupad gyod sa four wheels kon mataymingan nga ang traffic light pula.
May pipila nga kalit lang moagi sa imong atubangan ug mobalhin sa kinadaplinang lane sa tuo (right turn anytime with care). Apan pagsubay na sa dalang V. Rama, mo-U turn ug mo-right turn na pod diha tungod sa China Banking Corporation.
Ug padayon nang mosubay sa M. Velez Stret. Igo na lamang intawon sa paglingolingo ang mga tarong nga nakonsimisiyon sa delikadong gihimo niining mga siaw. Okay ra unta, kon sila ray madisgrasiya. Pero hasta mga nanag-amping madamay man god!
Mao nga dili kalikayan ang walay hunong kabalaka sa usa ka buotang drayber panahon sa rush hours, diin mora’g panon sa hulmigas ang mga nanagmotorsiklong mangguho-managan sa karsada ug magpatuyang rag ikis-ikis, overtake sa imong atubangan aron makalusot. Pastilan, daw gipaak sa hulmigas ang dughan sa mga nagpakabanang drayber, uy!
May mga kamerang nag-monitor diha sa nagkuros nga dalan sa eskina Banawa. Mahimo man tingale nga tsek-apon sa Cebu City Transportation Office (CCTO) ang footage sa ilang CCTV aron masubay-tumbok kining mga malapason, kinsa sagad mobuhat niini, oras nga wala pay traffic enforcers.
Gani, bisag anaa nay traffic enforcers sa karsada, daghan man gihapong nagmotorsiklo ang mo-counterflow. Dili ba dako kining insulto sa mga traffic enforcer? Dapat, panakpon kining tanan. Buwahan, magbaton nag kahadlok ug magmatngon.
Pero nganong nagbaha man gihapon kining mo-counterflow? Nagpasabot ba nga anaa silay daghang P1K o P5K nga ibayad? Or, anaa sa mga traffic enforcer ang deperensiya kay lugak ra ang pagpatuman sa balaod?
Higalang traffic enforcers, ‘sa ikauunlad ng bayan, disiplina ang kailangan.’ Kaanindot unta, kon kining mga naglarayng nagmotorsiklo, kinsa hilig mo-counterflow, mabukotan sa gidala ninyong balaod.
Kay kon ang balaod igo ra ninyong gunitan, unya dili iimplementar, unsa pa bay gamit sa gisul-ob ninyong uniporme kon pasagdan lang ninyo kining mga badlungong hulmigas nga nagkamang sa kadalanan? Nagpaabot pa ba kamo nga daghan ang mapaakan?