Sa way pagsulti pilay gasto. Posibleng moabot gyod og minilyon ka dolyar. Gilusad sa Malakanyang ang kalibotanong kampanya pagpalambo sa ngan ug kadungganan sa mga Pilipinhon. Ginganlan ang proyekto og, “We Give the World Our Best – The Philippines.”
Unang nakit-an ang advertisements sa buses sa London. Atol sa koronasyon ni King Charles III. Di tungod kay nitambong si Presidente Ferdinand Marcos Jr. Kon dili tungod sa presensiya sa taga ubang kanasuran. Gitakdang isalida sab sa ubang bahin sa Uropa, sa Estados Unidos ug sa dagkong mga syudad sa Middle East.
* * *
Nasaypan ang kampanya nga maoy puli sa karaang slogan sa turismo nga “It’s More Fun in the Philippines.”Nga gihubad nga pagbaratilyo sa Overseas Filipino Workers (OFWs). Ug pagtabon sa kapakyas sa gobyerno pagmugna og dugang trabaho sa nasud. Nga makiangayon ang suholan ug benepisyo.
Ambot unsay tinuod nga rason. Ang pasabot ba sa Department of Tourism (DOT) nga ang slogan modani sa mga turista kay Pilipinas ang labing maayong destinasyon. O ang katin-awan sa Office of the Presidential Adviser on Creative Communications (OPACC) nga ang slogan nagpasidungog sa OFWs.
* * *
Makapanlimbawot sa balhibo ang katin-awan sa pangu sa OPACC, Paul Soriano. Nga natudlo di tungod sa talento (kay gilangaw mang kasagaran sa iyang pelikula). Kon dili tungod kay pag-umangkon ni First Lady Liza Araneta Marcos:
“Through this country branding campaign, we want to uplift the spirit of our Overseas Filipinos and honor them, particularly for their values that make Filipinos known to do their best at whatever chosen field, wherever they go, and whatever it is they do. They truly deserve this.”
* * *
Kon ganahan si Soriano nga mopasidungog sa Overseas Filipinos, mosugyot ming mas epektibo sa ad campaign ang matinud-anon nga kausaban sa mga lagda sa gobiyerno:
• Panalipdan ang OFWs gikan sa pangabuso sa langyawng employers sa di pa sila malugosan o mapatay;
• Ibanan ang mga eskandalo sa pangurakot sa labing dagkong mga opisyal sa gobyerno nga makapauwaw pag-ayo sa ligdong nga mga Pilipinhon sa ubang kanasuran; ug
• Dasigon ang pagpatuman sa mga balaod bisan kinsay hingtungdan, sama pananglit sa pagbayad sa dakong utang sa buhis sa pamilya sa iyang kaugalingong iyaan.
* * *