Reward system batok drug pushers sa Argao gihangop

CEBU, Philippines —  Gihangop sa Police Regional Office(PRO)-7 ang inisyatiba sa Local Government Unit sa Lungsod sa Argao nga mitanyag og ganti kun kinsa ang makahatag og impormasyon nga moresulta sa pagdakop sa mga tigbaligya ug tigpayuhot og ginadiling drugas diha sa ilang lungsod.

Ang maong impormasyon gi-post sa page sa Argao Local Government Unit ug gipasalig nila nga dili ibutyag kung kinsa man ang mohatag og impormasyon ug manawag lang sa numero sa Hepe sa Argao Municipal Police Station nga si Police Major Andy Michael Roque sa 0998 967 3806 ug Argao Municipal Police Station 0942 553 3464.

Si Police Lt. Col. Gererd Ace Pelare, tigpamaba ni Police Regional Office-7 Director Brigadier General Anthony Aberin miingon nga makatabang kini sa kampanya batok ilegal nga drugas sa maong lungsod.

Nagpasalamat ang PRO-7 sa Mayor sa Lungsod sa Argao Allan Sesaldo sa maong lakang dungan sa pagbutyag nga dunay mechanic nga sundon sa paghatag og reward diin ang pinakadako nga ihatag kay P100,000.

Sa unang buwan sa paglingkod ni Aberin moabot sa P130 million nga balor sa illegal nga drugas ang nakompiskar sa kapulisan pinaagi sa nadawat nilang mga impormasyon.

“Challenging kaayo ning supply reduction efforts diri sa Central Visayas kay as I’ve said, porous kaayo ang topography bisag asa lang mosulod ang supply but makita pud nato ang effort sa PNP, PDEA and other law enforcement agency relentless pud siya so magkinahanglan pud ta og tabang sa atong community para magpabilin tang abtik, magpabilin tang dali ra makabantay sa supply sa illegal drugs”, sigon ni Lt. Col. Pelare. — IBM (BANATNEWS)