EDITORYAL - Transaksyon pinaagi sa internet

Uso na gyud karong panahona ang cashless transactions sama sa mga pagproseso og mga dokumento nga gitawag sab og paperless transaction ug karon dunay planong ilusad ang digital driver’s license sa Land Transportation Office.

Ang tanan halos gipaagi na sa online transactions, salamat sa pandemiya sa Covid-19 kay kung dili pa tungod niini dili mapugos ang mga tawo sa kalibotan sa paggamit sa internet sa pagbayad, pagproseso, aplikasyon ug daghan pang uban. Apan kagahapong adlawa,  mitiyabaw ang ang mga users sa usa ka digital wallet platform sa matud pa ilegal o walay pananghid nga bank transactions sa ilang kwarta. Ang ilang kwarta sa maong digital wallet gipangbalhin ngadto sa mga bangko nga walay pananghid kanila. Hinuon, ang kompanya sa maong digital wallet platform mipasalig nga walay nawala o nakawat nga kwarta sa ilang mga users sa maong hitabo ug mabalik ra ang tanan kagahapon sa hapon.

Gipasalig sab nila nga duna silay imbestigasyong himuon aron pagtino kun nganong otomatikong nagbalhin og kwarta ngadto sa duha ka partikular nga bangko ang mga accounts sa ilang mga users nga wala man nila kini buhata o walay otorisasyon gikan kanila.

Hinuon, dunay posibilidad nga kadto rang mga users aning maong digital wallet platform nga dunay bank accounts sa maong duha ka bangko maoy naapektahan kay ang uban wala man makasinati niini gawas lang nga dili sila ka-access kagahapon tungod kay “nag-update” pa ang maong platform.

Posibleng teknikal ra kaayo kini nga problema nga mahimo rang makorihian sa teknikal sab nga paagi. Sa mga users nga wala kaayo pa makasabot sa pamaagi o pasikot-sikot sa digital world, dali dayong magduda ug mangasuko.

Mao kini ang problema aning mga online transactions ilabi na kun maglambigit og kwarta, duna gyuy posibilidad nga mahitabo kini bisan unsang orasa ug ni bisan kinsa nga tiggamitan niini. Hinuon, kun itandi pud sa kinaraang paagi, mas maayo nalang kining modernong pamaagi kay gawas nga menus sa hasol ug menus sa peligro, mga tudlo ra nga gamiton sa pagpislit sa keypads sa cellphones ang kubalan. Apan bisan gani sa mga nasuhito na niini, mabalaka sab gihapon tungod kay sayod sila nga duna gyuy mga tawong eksperto sa pag hack og mga accounts ug kini maoy lisod nang mabawi tungod kay wala man magagikan ang sayup sa kompanyang nagpadagan sa digital wallet kondili ang mismo mang users nga nagpasagad o nagkumpiyansa.