Sa kamatayon managlahig relihiyon nagkauyon

Sulod sa adlaw sa Semana Santa, nangadto ang pamilya sa kanhi kauban nako sa trabaho didto sa usa ka beach resort sa norte ug nangaligo sa dagat. Matud pa, sa tubig nga lapas ra'g diyotay sa tuhod, nalumos ug namatay kuno si Yol, kinsa motulo na ka tuig nga miretiro sa iyang taastaas nga posisyon.

Wala dayon motuo ang taga Starbucks Boys Club, grupo sa mga retiradong ex-Pagcorians tungod kay bag-ohay lamang milabay ang pipila ka adlaw, diin himsog ug malipayon kaayo nilang gikauban si Yol sa mga nagselebrar og birthday didto sa eklusibong lawak-kan-anan, kantahanan ug kasayawsayawan sa miaging naghinapos nga bulan sa Marso 2023.

Hinungdan, nga gisusi kini sa mga miyembro sa Stabucks Boys. Ug daw gidakdakan sa labihang kasubo ang tanan, human maistorya sa misusi ang nag-inusarang katabang nila ni Yol, kinsa mikonpirmar nga tinuod ang maong balita.

Nakahukom dayon ang Starbucks Boys nga mobisita sa haya ni Yol. Usab, nagkasabot sa angayang buhaton aron mapaambit ang linawas nga pagtunol sa among deepest condolences and sympathies ngadto sa nagbangutang pamilya.

Pungpong sa mga bulak, sobre sa pagmahal, mass cards. Ug labaw sa tanan, pamisa alang sa kalag ni Yol, tanan gusto namong ihalad-hatag. Ang pangutana, dawaton kaha sa asawa ni Yol, kining apostolikanhong praktis natong mga Katoliko nga lain mag relihiyon iyang misis?

Ingon sa magisi sa dili masabot nga kalipay ang among kasingkasing dihang sa tumang kamasinaboton, misugot ra ang misis nga magmisa si Fr. Ruel Gado, SVD inig ika-alas 2:00 sa hapon, Abril 10, 2023 sulod sa Saint Peter’s Chapel atubangan sa haya ni Yol, diin itaas sa bungbong may balaang krus nga nagbitay.

Pamilya uban mga kadugo sa misis ug misis mismo ni Yol, mitambong-sabat sa maong Balaang Misa, diin sa maong yugto nga gimisahan ang kamatayon ni Yol, nagkahiusa sa pag-ampo ang mga Katoliko ug dili Katoliko.

Ug nabasa sa mga luha ang lungon tapos tanang tagtungod nga mitambong, miapil sab pagwitik-sabyag og Holy Water sa haya nga ilang gimahal. Dinhi gipakita nga bisag si Yol Katoliko unya iyang kapikas,dili, hangtod sa kamatayon ilang girespeto ang tagsatagsa nila ka relihiyon.

Pagkatahom nga talan-awon. Kapanaminan!