Serbisyo nga hinukad sa kasingkasing

“Alay Kapwa.” Kini ang humanitarian program sa simbahang Katoliko pinaagi sa Caritas Philippines ug nagsangasanga kini sa ubang mga dapit apil na sa Sugbo.

Kaniadtong1975 pa diay kini naumol ug nagpadayon hangtud karon diin daghan na nga katawhan ang nausab ang kinabuhi tungod sa programa.

Nahimo kining posible ug nilungtad hangtud karon ug mas nilapad pa ang mga serbisyo gumikan usab sa pagpakabana sa mga tawo ngadto sa isig ka tawo.

Gikan sa ginagmay ngadto sa dinagkong donasyon gikan sa manggihatagong kasingkasing ug sa sinserong pagdumala nakab-ot ang tinguhang serbisyo sa mga tawong wala gyuy ikasarang sa kinabuhi.

Atol sa presscon sa Cebu Caritas niadtong niaging semana pinangulohan ni Father Alex Cola, gilatag nila ang tanan nga programa, ako mismo nahingangha sa gihimo nilang social.action. Wala lang seguro kaayo ma-highlight, kay sama nako nakapangutana unsa man ning Alay Kapwa mora’g pareho ra man paminawon sa laing programa nga Alay Lakad, lahi gyud diay kini.

Angayan lang nga masayran ang kaayohan nga namugna sa programa sa social action arm sa Simbahan nga nakatutok sa humanitarian, developmental ug Justice and Peace.

Ubos niini ang mga malungtaron nga intervention nga nahimo sa kinabuhi sa mga tawo sama nalang sa paghatag og scholarship sa mga kabus pero deserving nga mga tinon-an, nihatag usab og medical care libre sa mga tawong wala gyuy ikasarang sa kinabuhi.

Pipila sa akong nahinabi nga pasyente nga naka-avail sa serbisyo sulod sa Caritas emotional nga nipadayag nga dakong pasalamat nila kay nabatyagan nila nga gihatagan sila og importansya ug gidawat sa katilingban.

Labaw sa tanan nakahatukod og dili mominus 200 ka mga balay alang sa mga nabiktima sa nabiktima sa bagyong Odette.

Dinhi nato makita nga kong tinud-on lang diay ang pagserbisyo mahimo gyud diay. Gikan lang kini sa donasyon sa katawhan apan nakahimo og desenting mga kapuy-an. Kong nahimo sa Cebu Caritas mas mahimo sad unta sa gobiyerno nga adunay unlimited resources.

Naa man to mga housing project ang kagamhanan sama nalang sa bagyong Yolanda apan naabtan nalang sa bagyong Odette murag kontrobersyal man gihapon.

Lahi ra gyud ang pagpakabana nga hinukad gikan sa kasing kasing, Padayon Caritas!