Lagda batok ASF

Samtang inanay na nga mibangon ang ekonomiya sa Sugbo gikan sa pagkahagba tungod sa pandemya,  laing hulga ang giatubang karon sa industriya sa pagpamuhi og baboy dinhi sa isla sa Sugbo.

Kini human gikumpirmar sa Department of Agriculture pinaagi sa Bureau of Animal Industry ang hingpit na nga pagsulod sa kagaw sa African Swine Fever.

Unang nakumpirmar ang ASF didto sa dakbayan sa Carcar. Sunod ang mga lungsod sa Liloan, Tuburan ug Sibonga ingon man ang  mga dakbayan sa Sugbo ug Bogo.

Apektado ang mga namuhi og baboy tungod sa hugot nga polisiya sa nasudnong gobyerno nga kinahanglang puohon gyud ang tanang binuhi nga baboy diha sa dapit nga dunay kumpirmadong kaso.

Mitiyabaw ang mga hog raiser tungod sa dakong alkansi. Bisan ang mga namaligya og karne apektado tungod kay nikunhod ang mga mamalit og karneng baboy.

Aron pagsalbar sa P11 bilyones nga industriya sa pagpamuhi og baboy sa probinsiya, nangisog si Gobernador Gwen Garcia nga di mosunod sa polisiya sa DA.

Agi og pagsanong sa panawagan sa mga namuhi og baboy dali nga gipahunong sa gobernador ang pagpatay sa mga binuhing baboy o culling, labi pa kadtong wa gyuy sintomas sa sakit.

Nagbuhat ang probinsiya og kaugalingon niining mga lagda unsaon pagbatok ang sakit.

Gihimug-atan sa gobernador ang iyang gahom ubos sa Local Government Code.

Tingali ang tan-aw sa ubang mga opisyal kang Garcia labihan gyud ka supakira, labi pa nga di ni unang higayon nga mibarog siya batok sa mga ahensiya sa nasudnong kagamhanan aron pagprotehir sa interest sa mga kabus.

Apan alang sa mga Sugboanon siya usa ka bayani ug tinud-anay nga nanalipod sa iyang katawhan.

Ug di mabasol ang gobernador sa iyang mga pagduda nga ang polisiya sa DA gitumong aron sa pagpanapi.

Kini tungod kay gawas nga notado ang maong ahensiya sa mga anomaliya pagpatuman sa ilang programa, kataw-anan sab tinuod ang ilang lagda mahitungod sa pagkontrolar sa ASF.

Sumala sa gitumbok sa gobernador, ipapatay sa DA ang tanang baboy diha sulod sa usa ka dapit nga apektado sa ASF tungod kay kun mataptan sigurado gyud kuno nga mamatay ang baboy.

Busa aron di mamatay sa ASF kinahanglang patyon daan ang baboy. Kataw-anan dili ba?

Ang pagduda sa gobernador nga gituyo ni ang maong polisiya aron makakita og rason ang DA nga mogasto og minilyon alang sa laing programa pagpasanay og balik sa pagpamuhi og baboy.

Mahimong sayop si Garcia apan angayang tahuron sa nasudnong mga ahensiya sa gobyerno ang local autonomy.

Sa kaulahian tulobagon man sa gobernador ngadto sa mga Sugboanon unsay dangatan niining iyang kaugalingon nga polisiya.