Hapit makalimting kaso ni Ronnel
Imbes mangayo og pasaylo sa dul-an sa tulo ka buwan nga kalangay sa pag-imbestigar sa kamatayon ni Ronnel Masamoc Baguio, nga giingong gipaubos og hazing sa Tau Gamma Phi fraternity niadtong Disyembre 10 sa niaging tuig, ang kapolisan nibasol pa hinuon sa mga ginikanan sa biktima.
Matod sa Cebu City Police Office (CCPO) gipalabi sa mga ginikanan nga ilubong una ang patay’ng lawas sa ilang lugar sa Mariveles, Bataan ug wa pa makatunol sa cellular phone ni Ronnel. Kuwang na lang og dyutay nga moingon nga obligasyon sa pamilya ang paghipos sa mga ebidensiya aron mapasaka ang mga kaso.
* * *
Klarong nagkara-kara ang CCPO sa imbestigasyon sa kaso human nabisto sa press conference sa Public Attorney’s Office (PAO) sa kaulohan niadtong Huwebes. Napugos ang inahan ni Ronnel pagdangop sa PAO tungod sa, nakatag-an ka, kalangay sa imbestigasyon sa CCPO.
Hinaut nga sa ilang pagdalidali di taphaw ang mga kaso nga ilang ipasaka sa sunod semana batok sa lima ka suspitsado sa hazing ni Ronnel, nga naglakip sa magtutudlo ug mga tinun-an sa University of Cebu Maritime Education and Training Center (UC-METC). Mas dakong inhustisya kon mabasura lang ang mga kaso kay mas daghang buslot kay sa ebidensiya.
* * *
Nindot paminawon ang pasalig ni Atty. Augusto Go, presidente sa UC, nga paningkamotang masilotan ang mga responsable sa kamatayon ni Baguio. Mga nakaila ni Go, labi nang kaliboan ka kabos nga tinun-an nga iyang natabangan, makapasalig nga di siya kutob ra sa istorya.
Makahupay tingali sa kabalaka sa pamilyang Baguio nga napasagdan ang kaso sa ni Ronnel kon si Go makapahibawo nila unsay gihimo sa UC sukad niadtong Disyembre. Nasuspenso o nataktak na ba ang magtutudlo ug mga tinun-an nga nagtinabangay pagkulata ni Ronnel?
* * *
Di unta mahimutang ning bakikaw nga sitwasyon ang CCPO (nga peligrong malabwan na sab sa kalidad sa pakisusi sa National Bureau of Investigation) ug sa UC (labi na kon mabisto nga wa masiloti ang maestro ug mga tinun-an) kon nakakita pa sa panginahanglan paghipos dayon og mga ebidensiya ug pagkiha ug pagsilot dayon sa mga responsable.
Di tungod kay na-headline ang kaso. Kon dili aron kahatagan og hustisya si Ronnel ug ang iyang mga tagtungod.
* * *
- Latest
