Dili makatarunganon ug grabe ang diskriminasyon ngadto sa mga pobreng motorcycle owners kining Motorcycle Crime Prevention Act nga mopahamtang og multa ngadto sa drayber kun ang iyang motor nga napalit di mabalhin sa iyang pangalan lima ka adlaw gikan sa pagkapalit niini.
Ang maong balaod gipangamahanan ni kanhi senador Richard Gordon kinsa miani og daghang pagsaway gikan sa motor riders. Ang maong balaod mas naila nga “Doble Plaka Law” nga gipasar niadtong tuig 2019.
Tungod sa maong balaod, sa unang mga adlaw sa implimentasyon liboang mga motorista ang nangatanggong sa mga police checkpoints tungod lang sa pagberipikar kun dili ba nila kinawat ang gimanehong motorsiklo.
Kani nga balaod wala ipatuman ni kanhi presidente Rodrigo Duterte niadtong 2019 kay gihulagway nga discriminatory tungod kay ang mga motorsiklo ra gyuy gipuntariya niini ug wala sa mga sakyanan.
Ang kadaghanan sa mga nagmotor karon, dili gyud ila ang nakabutang nga pangalan sa rehistro sanglit nakapangalan pa kini sa mga motorcycle dealers kay inutang man kini nila ug kinadugayan ayha maimpas tulo ka tuig. Tungod aning probisyona, daghang yanong trabahante nga nigamit og inutang nga motorsiklo ang nabutang sa alanganin sa ilang mga gitrabahoang kompanya kay ma-late og abot o ba kaha maka-absent nalang gyud kay di maberipika dayon ang rehistro sa ilang mga motorsiklo ilabi na kun sirado ang motorcycle dealers.
Gawas pa niana, dili sayon kay dugay pa kaayo mabalhin ang pangalan sa mga rehistro sanglit kinahanglan pa kining impason, bisan gani kanang hinatag nga motor, dugay kaayo ang pagproseso sa transfer of ownership, pun-an pa nga gastoso kini kaayo para sa mga pobreng gihatagan og motor.
Samtang maayo ang tumong aning mga balaora, maayo untang dili sab pasobrahan nga makapasamot sa kalisod sa mga pobreng Pilipino ug patas unta sa tanan apil sa mga de sakyanan kung dili man nila gustong usbon o korihian ang maong kwestyonable probisyon.
Maayo man ning mga magbabalaod nga dili man magmotor, pabor kaayo kanila, apan unsaon ang yanong si Juan dela Cruz?
Ang motorsiklo mao lamang ang labing praktikal nga matang sa transportasyon sa mga Pilipinong mamumuo nga dili makapalit og sakyanan nga ilang gikinahanglan sa trabaho o panginabuhi.