Ang tanang reklamo sa mga politiko ug sa dancing contingents batok sa South Road Properties (SRP) isip venue sa Sinulog Grand Parade ugma, Dominggo, gisulti na nga mas daghan og detalye ug mas klaro ang katin-awan sa niagi pang semana ni Ricky Ballesteros, kanhi executive director sa Sinulog Foundation.
Ang kalainan mao nga si Ballesteros way nahimo dihang giisnab lang sa mga tigpasiugda sa Sinulog karong tuiga ang lehitimo niyang mga rekomendasyon. Pero ang mga politiko makahimo sa paghudlat pag-boykot sa kalihokan kon di ibalik sa Cebu City Sports Center (CCSC).
* * *
Kon gipaminaw pa lang nilang Cebu City Mayor Mike Rama ug kaubanan ang komprehensibong paniid ni Ballesteros human niduaw sa SRP sa niaging Sabado, Enero 7, wa unta magtampisaw sa lapok ang mga mananayaw ug ilang props. Ni magkapuliki og pangita og kapasilongan pagbundak sa uwan. Ni magtinagoay pagtuman sa sugo sa lawas.
Pero silang Rama nituo sa ilang propaganda: Nga andam nang SRP. Maong way nakabantay nga usa ra ka tolda ang napabarug para sa contingents nga nag-ensayo. Ni nakalili nga di pa magamit ang shipping containers isip pansayan.
* * *
Kasaligan nakong tinubdan sa Cebu City Hall nihunghong nga dakong buslot sa pangandam karong tuiga mao ang labaw nga tagduma. Nga ilang gipasanginlan nga mas na-busy pag-ulug-ulog ni Rama. Gihulagway sang mas ganahang mo-istorya imbes motrabaho.
Mao ning opisyala ang gipasanginlang nisud og transaksiyon pila ka Sinulog ang nilabay paghimong eksklusibo sa coverage sa usa ka cable station ug pag-ban sa ubang mga sakop sa media gikan sa CCSC. Si anhing Mayor Edgar Labella ray nakabadlong sa iyang binuang.
* * *
Ambot makumbinser bang Rama ang mga politiko nga nihulgang mamutos ang ilang dancing contingents, inusikan ang minilyon ka pesos na sa buhis sa mga Sugbuanon nga ila nang naggasto, nga hatagan siya og higayon sa pagmatuod nga sakto ang SRP isip venue sa Sinulog.
Kon idayon ang grand parade sa SRP uban sa 12 ka nahibiling contingents, mas dako ang pahak sa upat ka kilometrong carousel route ug mahumang kalihokan sa udtong tutok. Gawas lang kon hapon na sugdan ug inaton pag-ayong parada. Aron maabtan og gabii ang ritual showdown sa kinakusgang contingents.
* * *