Kitang mga Katoliko nagtuo nga dunay purgatoryo. Ang kahimtang kun estado diin gitul-id ang mga kalapasan nga nabuhat dinhi sa kalibutan.
Walay katapusan ang kaayo ug kalooy sa Dios nga tungod niini nahatagan kita og kahigayonan nga mahingpit sa katapusang higayon aron mamahimo kitang angayan nga mosulod ngadto sa iyang himaya. Kinahanglan lamang nga makasinati sila sa gitawag natong purification diha sa kalayo sa pugatoryo.
Sa purgatoryo ang mga kalag nakaamgo nga gihigugma diay sila sa Dios busa bation nila ang kasubo kay nakaamgo sila nga diyotay lang ang ilang gibalos nga kaayo ngadto sa Dios.
Mga paagi aron makatabang kita sa mga kalag sa purgatoryo:
1. Una, mag-ampo kita alang sa ilang kaluwasan.
2. Ikaduha, pinaagi sa paghatag og hinabang, salapi man o kabtangan ngadto sa mga kabus natong mga kaigsuonan. “Ang gugma motabon sa daghang mga sala!” (cf. 1 Ped. 4;8).
3. Magpamisa kita alang sa mga nangamatay.
Hinumdomi: Mao kini ang atong pagtuo nga ang atong mga kaparyentihan, mga ginikanan nga nangamatay dako kaayo og matabang alang usab kanatong tanan.
Kun kita nitabang kanila, sila usab magatabang kanato. Timailhan lamang kini nga ang Dios gugma ug kinabuhi apan wala kini magpasabot nga atong abusaran ang kaayo nga gikan sa Dios.