EDITORYAL - Disiplina, disiplina, ug disiplina

Gihagit ni Cebu City Mayor Michael Rama ang mga  tawong nagduda nga makab-ot sa siyudad ang tinguha niyang Singapore-like nga dakbayan. Matud pa sa mayor mas maayong mamahawa sila dinhi sa siyudad kay wala sila kinahanglana dinhi.

Ang mayor gustong maghimo og dakong kausaban dinhi sa dakbayan, ang iyang gihimong modelo mao ang Singapore, moderno ug usa sa labing limpyo ug disiplinadong lugar sa kalibotan.

Gisugdan na gani sa mayor ang pagkutaw sa dakbayan gikan sa pagpanindot ug modernisasyon sa Carbon Public Market, pagpalambo sa serbisyo sa Cebu City Medical Center, paghawan sa mga aseras, paglimpyo sa mga nangamatay na nga mga sapa sa siyudad  ug tinguha nga buhion kini kun mahimo.

Dili tingali angay seryusohon o literal nga sabton ang pamahayag sa mayor nga papahawaon kadtong mga nagduda. Wala man sab tingali motuman sa mga nagduda o may pagduhaduha sa kapabilidad sa siyudad nga mabuhat kining pangandoy sa mayor.

Usa pa, kun wala na sila dinhi sa siyudad dili na nila mabatyagan ang dakong kausaban, mas maayo tingali nga masaksihan ug mabatyagan sa mga nagduhaduha nga natuman ang gitinguha sa mayor.

Apan dili kini makab-ot kun dili molihok ang mga gitahasan diha sa city hall pagbuhat sa ilang tagsa-tagsa ka mga trabaho. Dili sab ni sila manglihok og tarong kun kinaiya na nilang magmika atol sa trabaho.

Mao nga husto kaayo sa dihang nagsugod palang ang termino ni Rama ning tuiga, iyaha dayong gibaharan kadtong mga mga tapulan, tabian ug adis-adis nga mga kawani sa city hall nga sila tangtangon sa trabaho.

Kun dunay disiplinado ug nakapokus sa trabaho nga mga kawani ang dakbayan dunay kakuhaan og sanglitanan ang katawhan sa siyudad. Dili na unya malisod pagpasunod ang mga polisiya, direktiba ug ordinansa sa siyudad.

Samtang tuod lisod kining buhaton sulod lang sa tulo ka tuig sa termino sa mayor, dili kini imposible. Apan magsugod kining tanan pinaagi sa disiplina gikan sa mga kawani sa city hall hangtud sa barangay officials ayha pa sa mga konstituwente.