Sa dihang niduaw si Maria sa iyang ig-agaw

Ang pagduaw usa man ka akto sa paghalad sa kaugalingong panahon, presensiya ug kinabuhi. Panahon tungod kay kinahanglang imong talikdan ug ihiklin sa daplin. Presensiya kay dili lang mahimo nga anaa ang imong lawas apan wala ang imong diwa. Kinahanglang anaa gyud ang kinatibuk-an sa imong pagkatawo. Kinabuhi tungod kay buot nimong ipaambit ang sugilanon sa imong panaw ug aron masayud usab ikaw sa panaw sa kinabuhi sa tawo nga imong giduaw. Ning paagiha ang imong kaugalingong presensiya usa naman ka maayong balita kaniya nga imong giduaw.

Ang atong mahal niduaw sa iyang ig-agaw nga si Santa Isabel. Si Isabel talianak niadtong panahona. Busa nagkinahanglan siya og moagak ingon man moatiman sa iyang basic needs. Apan sa laing bahin, nagdala pud siya og maayong balita ang balita nga anaa sa iyang sabakan ang good news par excellence way lain kondili ang atong Ginoong Jesus. Buot pud siyang moambit sa maayong balita nga diha pud sa sabakan ni Isabel. Sa laktod kining maongpanagtagbo, panagtagbo sa duruha ka mga inahan nga nagmapasalamaton.

Ang pagduaw usa man ka matang sa panagalagad mao nga dinhi sa among parokya sa Madridejos, Alegria among gihimo kining maong pagduaw banay sa mga nagkadaiyang panimalay aron pagdala og mga pag-ampo ug panalangin. Salamat sa Mahal nga Birhen Maria sa Carmen nga nahimong mahinungdanon kabahin ning maong panaw. Salamat pud sa mga panimalay nga nidawat kanamo. Sa maong kalihukan akong nakita kining mosunod:

1. Mahinungdanon ang banay nga mapanalingan ug mapalig-on. Kay kini man ang sukaranan sa matag katilingban.

2. Ang presensiya ingon nga lider diha sa maampoong panagtagbo makadasig ug makahupay.

3. Ang atong pagkatawo mahingpit lamang diha sa atong pakigtagbo sa atong isig ka ingon.