Gibayaw na pagka “Venerable” ang Sugbuanong si Archbishop Teofilo Camomot, usa sa mga ang-ang sa nagkaduol na niya pagkahimong hingpit nga usa ka Santos sa Simbahan Romano Katoliko.
Si Camomot usa ka Sugbuanong Obispo nga naila sa iyang pagkamahiubsanon ug manggiluluy-on sa buhi pa kini.
Si Pope Francis bag-ohay mideklarar kang Camomot nga usa ka Venerable. Ang tawong pagabansagan niini sa usa ka Santo Papa nagpasabot nga kining namatay na nga indibidwal misakripisyo sa kinabuhi alang sa kaayohan sa tanan.
Si Pope Francis maoy mihatag og otorisasyon kang Marcello Cardinal Semeraro, Prefect of the Congregation of the Causes of Saints sa Vatican nagpahimo og decree sa bayanihong hiyas ni Servant of God Archbishop Teofilo Bastide Camomot ug ideklarar kining Venerable.
Usa ka mirakulo ang kinahanglan nga makonektar kang Camomot ang gikinahanglan aron kini madeklarar nga “Blessed” ug laing mirakulo sab aron hingpit kining madeklarar nga usa ka Santos.
Sukwahi sa ubang mga nahimong usa ka santos sa Romano Katoliko nga naabtan pa og dekada o siglo ayha pa nadeklarar nga santos sama nila San Lorenzo Ruiz, San Pedro Calungsod nga parehong mga martir sa pagsabwag sa relihiyong Romano Katoliko, si Camomot dili palang gyud dugay namatay ug karon gitinguha na nga kini himuong santos.
Dili man tuod parehas nilang Ruiz ug Calungsod nga gipamatay sa mga tawong dili gusto sa Kristiyanismo, si Camomot gitinguhang himuong santos tungod sa iyang kaayo ug pagkamanggiluluy-on ngadto sa katawhan ilabi na ngadto sa mga kabus.
Dili siya hakog, matud pa nga bisan gani iyang Krusipiho, singsing pagka-obispo, iyahang giprenda ug ang abot iyang gihatag ngadto sa mga kabus.
Namatay siya sa usa ka aksidente sa Lungsod sa San Fernando niadto lang Septiyembre 27,1988 sa edad nga 74.
Si anhing Cebu Arsobispo Ricardo Cardinal Vidal kinsa personal sab nga nakaila ug nakauban kaniadto ni Camomot miingon nga ang bayanihong buhat sa naulahi buhat sa usa ka Santos.
Niadtong tuig 2010 si Vidal nipahibalo nga ang Vatican mimando paghimo og pagtuon bahin sa beatification ug canonization alang sa paghimong usa ka Santos ni Camomot.