Super Bob

Una nako siyang nahimamat niadtong first year Theology pa ko. Mao kadtong higayona nga gihimo namo ang recording sa usa ka drama alang sa vocation month. Kahinumdoman ako nagsuwat sa maong script.

Hangtud nga niabot ang panahon nga napari na ko ug nagkahimamat gihapon kami ni Super Bob sa mga higayon nga dunay panagpundok ang mga media personalities kaniadto hinuon dili tantong dugay ang pagtimbayaay kini tungod kay sayud kong si Fr. Mark Barneso akong classmate mao man ang iyang suod nga higala.

Gani mag-abot kining duha sa mga imnanan. Hinuon gawas sa inom mas daghan ang tabi ug pagpadayganay sa mga panahom kalabot sa mga hitabo ning atong katilingban.

Bisan pa man kun nahimo akong script writer sa estasyon DYHP padayong gipaminaw nako si Super Bob.

Sa tinuod lang, makalingaw usahay ning iyang mga komentaryo. Dili mawala ang mga sarkastikong termino. Wala siyay santoson.

Ingon ana siya kaisog. Apan wala kini magpasabot nga siya walay kasingkasing.

Ang iyang kasingkasing dunay kalooy usab sa mga nagkinahanglan mao nga dunay mga programa usab siya alang sa mga nagkinahanglan.

Nangangkon siya nga dili siya hingpit nga tawo. Nangangkon siya nga sama sa uban ana apud kaniya ang sala.

Apan bisan pa niini si Super Bob wala makalimot pagsangpit sa Dios matag karon ug unya.

Garboso man tuod siya tan-awon apan sa kadaghanan siya maabi abihon.

Padayon sa imong panaw Super Bob. In Pace Rquiescat!