Insulto sa usa ka presidente sa nasud kon ang iyang kamandoan dili sundon sa tanan. Ilabi na kon ang nagpasiugda sa pagsupak niini, dakong opisyal sa kagamhanan, kinsa tungod kay suheto sa pamalaod, dili bastabasta nga mapugos kay ingon sa dili madutlan ang kalig-on sa iyang kaalam nga maoy gihimo niyang taming pagpanalipod sa iyang tawhanong katungod.
Tungod sa kapaspas ug grabing pagsaka sa padayong pagtinakdanay sa katawhan niining omicron variant nga ania na sa atong nasod, gipahimug-atan pag-ayo ni Presidente Rodrigo Roa Duterte, pinaagi sa National Inter-Agency Task Force, ang pagpasunod sa “No vaccination, No entry ug No vaccination, No ride”policies, isip usa sa mga epektibong hinigiban nga makaprotehir sa katawhan.
Busa, gihangyo ni Health Secretary Francisco Duque III si Public Law Office (PAO) chief Dr. Persida Rueda-Acosta nga unta magpabakuna na aron siya ug iyang ginsakpan maprotektahan batok niining COVID-19 nga nag-wild na usab sa atong palibot. Diin, daghan nang nangamatay ug sagad unvaccinated seniors.
Mipahinumdom si Duque nga si Acosta mo-senior citizen na ug mas maayong maindeksiyonan ang PAO chief og anti-COVID-19 vaccine. Ilabi na, nga may sensitibong sakit man diay kining gihambin. Nahingawa si Duque nga basig mahitumpawak, simbako, si Acosta sa delikadong kahimtang. Busa, gusto siyang madepensahan kini.
Apan imbes magpasalamat, nagpabiling gahi si Acosta sa hangyo ni Duque. Hinuon, miangkon nga wala pa makapabakuna kay adunay medical history sa hypertension ug allergic reactions. Rason, nga nagpaabot lang siya kon anaa nay protein-based jab ug dinha pa magpa-inject. Giklaro ni Acosta nga dili siya anti-vaxxer.
Pastilan, no? Makalibog! Dili kuno siya anti-vaxxer, pero dili pa magpabakuna? Kay nagpaabot sa wala pa diha.
Alang nako, sa nagdagang mga adlaw nga ang citizen wala magbakuna sa libreng vaccine nga gihatag sa gobiyerno sanglit may kaugalingon siyang bakunang gipaabot, makonsiderar gihapon siyang anti-vaxxer sa maong mga adlaw. Mapruyba lang nga siya pro-vaxxer sa higayon nga siya magpabakuna na.
Ang saad nga pagpabakuna nga kutob lang sa pulong ug wala pa buhata, dili makonsiderar nga ikaw mituman na sa kamandoan. Dili pa kini matawag nga usa ka pagtuman. Buhata una ang unsay imong gisaad. Ug matuman mo na ang kamandoan.