Niadtong nakalabay’ng semana naghimo ko og feature story mahitungod sa mga makapanglimbawot nga kasinatian sama sa mga espirito ngq wala mahiluna nga padayong nagpabatyag sa mga buhi.
Sa Fort San Pedro naestorya nako si Mr. Erwin Delacerna, ang manager, ug didto gipaambit niya ang duha ka sugilanon nga hangtod karon naghamok pinaagi sa pagpakita sa mga tawo lakip na sa ilang mga staff.
Una ang White Lady nga nakuhaan og hulagway sa usa ka guest nga mibisita sa Fort San Pedro ug isip handumanan nagpakuha siya og litrato.
Sa unang tan-aw normal ra nga walay sabod sa hulaway apan kong tan-awon og maayo anaa sa iyang background ang babaye nga nakaputi ug nagdunghay ang buhok, hinoon ang nawong niini hanap ug dili gani maklaro.
Ang gisul-ob niini daw biste sa karaang panahon diin matud sa estorya nga nasagap sa mga staff usa kuno ka babaye sa panahon sa mga Katsila ang nilukso sa Fort San Pedro ug mao kini ang gituohan nila nga naghamok sa dapit.
Kasagaran magpakita kini sa veranda sa museum sulod sa Fort San Pedro ug usahay sa dakong punoan sa karong balite o dakit.
Dili man hinuon siya manghilabot apan naghatag kini og kahadlok sa mga tawo nga adunay ESP nga makakita kanila.
Laing hamok sa Fort San Pedro ang usa ka anino nga gitawag nilang Black Shadow nga nakuhaan usab og litrato atol sa usa ka photo session.
Kining maong nilalang ang manghilabot kuno sa mga staff nga usahay manuok sa mga guard nga makatagpilaw panahon sa kagabhion.
Seguro ang ubang tawo dili motuo sa mga sugilanon sama niini nga moingon lang dayon nga bunga lang sa imahinasyon apan alang da mga tawong naka experience dili usab nato sila mahukman.
Gipasabot ni Monsenyor Joseph Tan, ang Media Liaison Officer sa Archdiocese sa Sugbo, nga giila nila nga adunay mga kalag nga magparamdam tungod kay nagkinahanglan sila og paampo kanatong mga buhi nga nahabilin niining kalibutan.
Busa ang atong mahimo karon mao ang paghalad sa tim-os nga pag ampo alang sa kapahulayang dayon sa mga kalag nga naglatagaw sa kalibutan sa mga buhi.
Dili man kita makaadto sa mga sam-ang aron pagduaw nila apan mahimo nato silang pahinungdan sa pag ampo bisan mismo sa atong mga pinuy-anan ug sa simbahan.