Mater Dololosa
Gidapit ko sa akong classmate nga si Padre Amador “Mhadz” Bacotot sa pagsaulog sa duroha ka misa ingon man sa pagtambong sa Misa Concelebrada.
Sa akong pamalandong bugtong ang Ronda lamang nga parokya sa Sugbo ang dunay linain nga debosyon alang sa Mahal nga Birhen sa Kasakit.
Ang ubang mga parokya sa laing bahin nidala sa laing mga titulo sa Mahal nga Birhen. Gibasa nako ingon nga ebanghelyo ang ebanghelyo ni San Juan diin ang Mahal nga Birhen sa hilom nagbarog sa tiilan sa krus samtang nagsud-ong sa iyang anak nga nagtinga ug nagbitay didto. Walay bisan usa ka pulong nga nadungog ni mga pulong nga napatik sa balaang kasulatan kalabot niini.
Tingali bugtong mga luha ang nidagayday gikan sa mga matang wala makapiyong sa nilabay nga gabii tungod kay lisud tugkaron ug dawatong nganong gitugotan sa Dios nga ang iyang anak mag-antos sa ingon nga kasakit.
Apan bisan pa niana ang maong inahan nagmaisogon hangtud sa katapusan. Buot niyang ubanan ang iyang anak hangtud sa pagkabugto sa gininhawa niini. Gitawag kini og Ministry of Presence.
Ning panahon sa dakong kalisdanan angayan natong batonan kining mosunod:
1.Sensitivity sa panginahanglan sa uban. Usahay ang tumang kahadlok sa virus maoy nibabag kanato sa pagkahimong makatawo kay lagi, ang pagduol nagkahulogan naman por lo menos og takud. Ayaw paduol aron dili takdan, labaw na ayaw paghikap aron di matakdan.
2. Ang pag-antos ug pagsakripisyo duroha ka managlahing mga butang. Ang pag-antos mahimong mahitabo labina kun hawa kini sa paghigugma. Ang sakripisyo sa laing bahin nahitabo tungod kay anaa ang paghigugma. Mao kini ang nakapahimo sa maong pag-antos nga makahuloganon.
3. Dili sa tanang higayon ang usa ka suliran nagkinahanglan og sulbad ang gikinahanglan lang niini mao man ang pagpaminaw.
Dili man tuod kita makapugong sa kamatayon apan mas makahuloganon nga anaa kita sa kiliran sa himatyon.
Dunay mga higayon nga malisod dawaton ang pagsulay. Apan ang bugtong paagi sa paglahutay mao man ang pagpatabang sa Dios nga mas gamhanan pa kay kanato.
- Latest
