Angay bang mohatag sa offertory?

Tungatunga sa Santos nga Misa, human sa akto sa liturhiya, mobalhin-barog ang pari diha sa sagradaong talad sa Eyukaristiya aron ipahigayon ang yugto sa paghalad.

Dinhi, may mga naglinyang deboto ang nanagdalag bino, ostiyas, sobre ug ubang matang sa halad, paingon sa atubangan sa altar. Usab, adunay mga kolektor magbitbit og sibot ang moduol ngadto sa tanang nanimbahay aron didto isulod ang ilang love offering alang sa Ginoo.

Pero, subo palandungon. Kay bisag ang sibot nay miduol sa ilang tungod, kasagaran maglingiwlingiw dayon. Bisag misaghid na ang sidsid sa sibot sa ilang bulsa, wala gihapoy nakita.

Sila nalimot. Nga kutob sa unsay anaa kanato, Siya maoy tag-iya niini. Unya, bisan gamay, wala tay ikatunol sa Ginoo panahon sa offertory agig pasalamat sa Iyang pagkamanggihatagon?

Gani, dihang nakita ni Hesus kadtong usa ka pobreng biyuda nga mihulog sa kataposan niyang duha ka sentimo ngadto sa halaran, natandog man Siya ug midayeg niini dungan ang pagsulti sa mga apostoles:

“Sa pagkatinuod, sultian tamo. Kining kabos nga biyuda nakahatag og labaw sa tanan. Kay ang tanan nanghatag gikan sa ilang kaadunahan. Apan naghatag siya sa iyang kakabos. Gihalad niya ang tanan nga iyaha, ang iyang kabuhian.” (Marcos 12:43-44)

Nga sa ato pa, ang Ginoo nagtan-aw diay kanunay kon ang tanang mitambong sa Santos nga Misa, kinasingkasing bang miapil paghulog og halad didto sa binukhad Niyang mga palad (nga mao ang sibot) panahon sa offertory.

Hinumdomi. Ang offertory kabahin sa misa. Kon kita dili mosalmot sa paghatag-halad, sama rang wala ta moapil sa kinatibuk-ang misa.

Sama rang gisalikway nato Iyang mga palad, kinsa mipahinumdom giunsa ta Niya pagsapnay dihang puwerti natong luhodluhod, nagsigeg sangpit og panabang sa matag higayong giabot na kitag kaluya sa pagpakigbugno sa mga dagkong balod nga mihasmag sa atong kinabuhi.

Ang offertory akto sa pagpasalamat sa tanang grasya nga atong nadawat gikan Kaniya. Kahinumdoman, human ayoha ni Hesus ang 10 ka nagpakiluoy’ng sanglahon, diin usa ray mibalik aron magpasalamat Kaniya, Siya nangutana: “Hain man diay ang uban?”

Mao usab kini ang Iyang ipangutana panahon sa opertoriyo. “Hain man diay ang uban?” Sukna-pasumbingay nga nagtug-an: Angay gyod diay mohatag tanang nanimbahay sa offertory.