Wala na kinahanglana nga suginlan nato ang tanan sa atong suliran kay kadaghanan nila dili man interesado niana.
Ikaduha, dako nilang kalipay nga naproblema ka. Kini gyud ang hinungdan kon nganong daghang mga tawo karon ang nahimong mga indifferent sa kahimtang sa uban.
Mga tawong bugtong kadautan lamang ang Nakita ug dili ang imong kaayo.
Mga tawo nga nagsud-ong lamang sa imong kalisud ug dili ang mga butang maayo nga imong nahimo. Mga tawo nga salbahis kon buot hunahunaon.
Ang malisud nga kinabuhi nahimong daw idlas ang pagsabot.
Ning maong gubat sa dakong kaligutgot mahimong mohaling sa kapintas sa usag usa. Kapintas nga imbis magdala og kalinaw magdala man hinuon og dugang kaligutgot. Mas maayo pa nga magpakahilom. Lisud na kun maoy tuyoan.
Sa atong panaw sa kinabuhi padayon kitang maningkamot nga makigbisog alang sa kalinaw sugod mismo sa atong kaugalingon.
Apan unsaon man pagkab-ot niini kun kita mismo ang gihikawan sa ingon. Ingon ini ang mga tawo ning panahona karon. Kusog kaayong modaut nimo ug kusog kaayong manghimaraot.
Apan bisan pa niini, batoni lang sa gihapon ang kahilom.
Ayaw tugoti nga ang mga tawo masayud kon unsay anaa sa imong hunahuna karon. Mas maayo nga imo lamang kining tipigan diha sa kahilom kay ang paghimo sa ingon paagi man aron mamahimong malaraw mo sa hingpit ang tanan diha sa kahilom.
Nindot baya gyud nga mopaduol aron motabang ug makigsandurot. Apan ning panahon sa dakong pandemiya daghan sa mga tawo ang dili na maayong saligan.
Kay ilang giapas lamang ang imong kapakyasan. Subo man tuod palandungon apan mao ang buhing kamatuoran.
Sa dihang gihapsay ko ang akong mga gamit ug mga libro nahimong daw nanumbalik ang malimbasugong tinguha nga unta mamahimong hapsay lang gyud unta ang tanan.
Apan pakyas. Daw sa nakita ko na ang duol kong katapusan. Inihap na lang ang akong gininhawa ug dili nako ganahan pang moginhawa pa aron lamang mabuhi.
Apan kinahanglan kong magpakabuhi aron makasugakod sa pakigharong sa mga dautang lihok ug tinguha nga nagpahipi sa matag pahiyom sa matag tawong nipadayag kunohay sa ilang pagpakabana. Usahay ang Dios dili makamatngon niini mao nga sila pasagdan lamang niya.