Nasubo gyud kaayo ko sa kalit nga kamatayon ni Kongresista Raul del Mar, ang kongresista sa Cebu City north district.
“Agaw” ang itawag ni Del Mar nako, meaning “ig-agaw” apan dili gyud mi manag-agaw. Ako, “sir” gihapon ang itawag nako niya kon mag-estorya mi, apan kon sa text ang akong itawag niya “agaw-sir.”
Dili na lang nako isulti kon ngano nga ingon niana ang among pagtagdanay. Sa among kasuod, nasinati nako ang iyang batasan nga dili gyud palaaway.
Usa ka eleksyon, ang iyang kaatbang nagbutang og dako kaayong streamer nga nagbansiwag ang ngalan niini diha sa skywalk sa Lahug, nga atubangan gyud sa voting center, nga kalapasan na sa balaod.
Giingnan nako si Del Mar mo-interview ko niya sa radyo bahin niini, giingnan ko niya nga “ayaw niana kay makakita ta’g away, pasagdihi lang na, ang katawhan ra ang magbuot.”
Ang resulta, si Del Mar maoy nakaangkon og makabungog nga botos. Wa gyud siya’y palta pagtambong sa mga sesyon sa Kongreso sulod sa modul-an na sa 27 ka tuig.
Samtang ang ubang kongresista namauli na atol sa budget deliberation, si Del Mar ug si Kongresista Rodrigo Abellanosa sa Cebu City South District, wa gyud mopauli bisan alas dies na sa gabii.
Duhay higayon nga naospital si Del Mar ug may dextrose pa nga gitaod sa iyang bukton, mitambong gyud siya sa sesyon.
Usa siya ka public official nga sinsero sa pagpangalagad ug maoy rason nga wa gyuy nakapilde kaniya bisan og giatbangan pa og mga iladong tawo.
Dunay ubang tawo nga atol sa kampanya mibugal-bugal pa gani ni Del Mar ug mihulagway nga tiguwang na kuno, apan karong patay na si Del Mar, misuwat na og mga pulong sa pagyukbo sa iyang pagkatawo.
Gani, bisan ang mga politiko nga anaa sa kaatbang nilang pundok, midayeg man ni Del Mar kay atol sa pangampanya, mahigalaon kini ngadto kanila.
Pagkamatay sa akong Papa, giadto gyud ko niya ug gipangutana kon wa na ba ko’y problema sa mga bayranan kay siya ang moabaga.
Akong giingnan nga dunay insurance si Papa mao nga libre ang iyang funeral services, ug kadto dili nako makalimtan kay mitanyag siya’g tabang, apan akong gibalibaran kay maikog man ko sa punerarya nga di nako ipagamit ang insurance abi kay dunay mobayad.
Karong patay na si Del Mar, atong lauman nga unta, may mga tawo pa nga susama kaniya og batasan nga sinserong mangalagad sa katawhan, ug dili ipatigbabaw ang kaugalingon nilang interes.