Bisperas sa Pangilin ni San Agustin, saulogon ug handumon ang pangilin sa iyang inahan nga si Monica. Asawa siya ni Patricius sa Tagaste. Ang iyang bana pagano apan human sa the 18 ka tuig sa kaminyoon ang nihangop sa kinabuhing Kristohanon ug namatay kini ingon nga Kristiyano.
Duna silay mga anak nga sila Navigius, Perpetua ug Agustin. Sulod sa hataas nga panahon si Agustin daw sama sa usa ka karnero nga nahisalaag. Ang maong pagkahisalaag maoy nagdala kaniya ngadto sa kawalay kapaingnan. Si Monica padayong mipabuhagay sa iyang mga luha alang sa iyang anak. Ang matag adlaw nga pagsakripisyo ug pag-ampo nagbunga sa dihang si Agustin nabag-o ug nihangop sa pagtuo apan nilanat una kini og mga napulog pito ka mga tuig una nahatagan og igong katumanan ang maong pangandoy sa inahan.
Si Agustin nga iyang anak nahimo mang San Agustin ug maingon tang usa sa mga mahinungdanong personalidad sa atong pagtuong Katoliko.
Si Monica dili lang sumbanan sa pag-ampo kondili sumbanan usab siya sa kinabuhing mapailubon. Dili gyud tingali lalim ang iyang naagian kay tiaw mo na ang kasal ngadto sa usa ka pagano wala man sa iyang mga laraw.
Apan ang maong pag-antos nahatagan og kahulogan tungod sa iyang dakong gugma sa Dios. Ang iyang pagpailob nahimong mas makahuloganon ug gani nahimong nagmabungahon sanglit ang kinabuhi sa mga sakop sa iyang pamilya mao man ang timailhan nga nilihok gyud ang grasya sa Dios mismo diha sa ilang kinabuhi.
Ning panahon sa kasamtangan malisud alang kanato ang paghupot og mapailubong kasingkasing ug kinaiya. Tinuod nangindahay kita og paspas ug sayon nga kinabuhi.
Apan mosugot kita o sa dili anaa gyud ang pagsakripisyo. Unta maantigo kitang mohangop niining sakripisyo ug ato kining ihalad ngadto sa atong mga inahan nga sama ni Monica tingali ang nahiagom usab sa mapintas nga kinabuhi apan bisan pa niini padayon gihapon kita nilang gihigugma ug gipangga. Santa Monica iampo kami ingon man ang among mga inahan!.