Sa dihang nadestino ko sa Our Lady of the Sacred Heart Parish kun Capitol Parish ug si Fr. Ricric mao man ang nihulip kang Padre Eping isip team member kuyog namo si Monsenyor Ting ingon man Fr. Mat ug Bishop Dennis. Sa maong panagkuyog namo, si Padre Ricric makaingon ko simple nga tawo.
Dili siya buot ug bisan unsang anaa sa limelight. Gani, kun dunay mga misa sa mga dapit sa Beverly Hills dili siya hilig sa mga dapit sa dagitab, mas moangay siya sa mga dapit sa mga yano ug baryo sa probinsiya.
Sa makadaghang higayon kalitkaliton lang siya og hulbot sa iyang mga assignments aron ibalhin sa lain. Sa makadaghang higayon ang iyang mga bagahe sa laing parokya hangtud gani tingali karon ang wala gyud niya maablihan. Kini tungod kay si Padre Ricric on the go ra man gyud tawon. Sa matag higayon nga kami magkaon, dugay kaming mahuman kay magtabi pa man kami sa mga kasinatian niya kaniadto.
Sa seminarista pa siya hangtud nga napari na. Sa laktod nga pagkasulti dili lisud ang makig-uban kaniya. Subo lang palandungon nga siya mitaliwan na ning mga panahona sa pandemiya. Gani malisod ang pagduyog sa iyang banay physically kay sa daklit ilubong man dayon siya.
Ang kinabuhi gyud bitaw sa tawo hamubo ra gyud kun itandi sa eternidad. Mahimong magkuyog kita karon apan ugma dili na. Mahimong ang atong panagbangi karon dili mahatagan og pagtak-op sanglit usa man kanato ang gibakwi gikan sa atong panagkuyog. Mao nga ato gyung himoong mabulokon ang atong panagkuyog.
Si Padre Ricric makaingon ta way libog dili tungod kay dili siya buot morisgo. Wa siyay libog tungod kay nasayod man siya sa iyang luna ug gimbuhaton. Apan sa akong personal nga kasinatian maantigo pud siyang mopadangat sa iyang baruganan ngadto kanila nga mga malapason.
Ning panahon sa pandemiya adunay mga pagtulon-an nga angayan natong kat-onan:
1. Una, nagkinahanglan man tuod ta og kwarta apan dili kini makapaluwas kanato gikan sa tino nga kamatayon. Makapataas man tuod sa kinabuhi apan dili makapugong.
2. Mas mahinungdanon ang relasyon kaysa bisan unsang bahandi.
3. Ang tanan lumalabay ra gyud ang bugtong magpabilin mao man ang atong maayong kasinatian uban sa tawo nga nalambigit kanato sa bisan unsang paagi.
Pahulay Padre Ricric ug magkita ra gihapon kita sa langit, Padre Ricric Bai! Among higala! Ayo-ayo sa imong panaw.