Mga mamumuo taliwala ning bungol ug amang nga kalibutan

Kining maong teksto sa Ebanghelyo mao man ang kinaham nga teksto ni San Hanibal Maria di Francia. Ang linatin niini mao: “ROGATE ERGO DOMINUM MESSIS UT MITTAT OPERARIOS IN MESEM SUAM!” nga kun hubaron sa pinulongan nato: “PAG-AMPO KAMO SA TAG-IYA SA ANIHON ARON MOPADALA SIYA OG DUGANG PANG MGA MAMUMUO NGA MOANI NIINI!” Apan kun buot hunahunaon daghan usab sa mga tawo niadtong mga panahona ang wala gihapon motuo sa Ginoo bisan pa man sa gipakita niyang mga milagro. Bisan gani ang paghingilin niya sa bungol ug amang nga yawa gidudahan pa man gani.

Kay alang sa mga Pariseo ang niakusar man kaniya nga pinaagi sa gahum sa prinsipe sa mga yawa.

 Ang nahitabo mao nga ang mga pariseo nahimong bungol sanglit nagdumili man sila pagpaminaw sa kamatuoran pinaagi sa mga pagtulon-an sa atong Ginoo ug sa laing bahin, nahimo silang mga amang gumikan sa ilang pagdumili sa paglitok og pipila ka mga pulong sa pagdason kun pag-uyon sa mga buhat sa atong Ginoo. Sa laktod nga pagkasulti nahimo silang mga gahi og ulo ingon man tig-a og kasingkasing.

Ning panahon sa dakong krisis diin nahimong dalaygon ang pagpunay og puyo kaysa paggawas aron manlimbasog aron mabuhi, ang pagpalayo sa usag usa inay ang paggakos ug paghangop, nahimong daw sa usa ka dakong anomaliya ang paghikap ug pagpaduol tungod sa COVID-19.

Malisud alang sa usa ka mamumuo ang pag-ani sa mga anihonon ning parasan sa atong Ginoo.

Kay unsa man diay ang tahas sa usa ka mamumuo? Ug nganong kinahanglan iya mang anihon ang mga anihonon sa parasan?

1.  Una mao nga anihon niya ang mga binhi sa katawhang niila sa Dios aron sila pundokon.

2. Ikaduha, human sila mapundok himoon pud niya ang pagtudlo kanila sa pagtulon-ang Diosnon.

Ning panahon sa dakong pandemiya usa ka dakong hagit ang pagpundok ug pag-ani kini kay mismo ang mga anihonon ingon man ang mga mangangani nahimong nalumsan sa tumang kabalaka labina kun maghisgot kita og pagpabiling lig-on ug manggihunahunaon taliwala ning panahon sa dakong krisis.

Kay daghan ang magpakaamang ug magpakabungol gumikan sa kalisang nga hilabihan.

Kalisang nga basin og kun motingog mamahimo silang biktima unya sa berdugo kang kansang tinguha mao lamang ang pagpakaylap og kalisang bisan mismo sa iyang ginsakpan.

Nahisama siyang Vlad Tepish ang nailhang dracula kang kansang kinabuhi kalisang na mismo sa tanan.

 Unta ang atong mga mamumuo diha sa sagradong orden magpabiling maisogon ug maningkamot nga dunay mahimo alang sa kaayohan sa kinabag-an sa mga karnero nga ilang giatiman.