May bag-o nang mga hawod
Di na sama kagawasnon ang lokal nga mga opisyal nga mohimo sa bisan unsang lagda nga ilang mahunahunaan sa kampanya batok sa COVID-19. Kay gawas nga gibantayan na sila sa nasudnong gobyerno gipahamtangan pa gyod og laing mga sapaw sa burukrasya. Kon di man mapapas ang ilang kahawod malasaw na ang ilang naandang gahom.
Nabantang ang dakong kausaban sa kalit nga pagkanselar sa tanang 250,000 ka quarantine passes sa mga molupyo sa Dakbayan sa Sugbo. Pila lang ka takna human nipasalig ang niduawng mga sakop sa gabinete nga way lockdown.
* * *
Nitumaw ang kalibog nganong gilaktawan si Cebu City Mayor Edgar Labella sa pagkanselar sa mga pases. Si Heneral Ignatius Ferro, kinatas-ang opisyal sa kapolisan sa Central Visayas, ang unang nipahibawo nga di na magamit ang pases sugod sa alas-10 niadtong Martes sa gabii.
Si Koronel Cydric Tamayo, hepe sa Cebu City Police Office, nipahibawo sa iyang mga sakop nga ang sugo pagsuspenso sa quarantine passes iya ni DILG Secretary Eduardo Ano. Nipuno pagpasabot si Ferro nga si Labella nisugot sa rekomendasyon sa Regional Inter-Agency Task Force (RIATF).
* * *
Si Labella, nga naabtan og tungang gabii niadtong Martes una nakahimo sa iyang kaugalingong pahibawo, niingon nga human sa rekomendasyon ni Ano pagsuspenso, hingpit na niyang gipakanselar ang tanang quarantine passes.
Apan ang bisan unsang pagsuway ni Labella pagpanalipod sa iyang importansiya gisukwahi ni Heneral Melquiades Feliciano, bag-ong natudlo nga deputy implementer sa Kabisay-an sa National Task Force batok sa COVID-19. Kinsa niingon nga si Ano ang nisugo pagkanselar sa quarantine passes.
* * *
Gitakdang magpabilin sa Sugbo si Heneral Roy Cimatu, nga daghan og titulo: “adjunct” sa IATF, overseer, troubleshooter ug eyes and ears sa presidente. Bisan nikumpisal si Cimatu nga wa pay dokumento nga naglatid sa iyang gahom, gipasaligan siya sa Malakanyang nga makahimo siya pagpatuman dayon sa iyang mga rekomendasyon.
Gawas nilang Cimatu ug Feliciano, may gitukod sang Task Force Cebu City ug Task Force Cebu Province. Pasiunang mga timaan nga nanagana na silang Labella ug ubang lokal nga mga opisyal sa paglihok: Nalangay ang mga lagda sa bag-ong quarantine passes ug kanus-a magsugod ang pagdili sa mga trabahante pagsud-gawas sa dakbayan. [email protected]
- Latest
