Salamat sa pagpaabot sa Malakanyang sa kataposang mga gutlo niadtong Lunes una ipahibawo sa pagbalik sa enhanced community quarantine (ECQ) sa Cebu City ug modified ECQ sa Talisay City sugod gahapon, Martes, nipatigbabaw ang kakugang ug kalibog:
Napugwat ang mga molupyo nga natanggong pagbalik sa kabalayan;
Napugos ang mga negosyo pagpanira pagbalik ug nahugnong mga trabahante nga nawagtangan na sab og panginabuhi; ug
Nahinayak pagsubay sa ilang mga rota ang mga sakyanang pamasahero ug nabawo ang mga pasahero gahapon sa buntag kay uwahi nang nahibawo sa ECQ ug MECQ.
* * *
Kon di pa igo ang pagpaundayon sa naandang kalangay pagpahibawo sa bag-ong mga lagda sa Inter-Agency Task Force (IATF), gisamotan ni Presidente Rodrigo Duterte ang kayagaw pinaagi sa pag-angkon nga mahimong mausab pang mga lagda kay makigtagbo pa siya sa mga negosyante nga nag-apura pag-abli na pagbalik sa mga industriya.
Kon naluwatan na sa IATF ang mga rekomendasyon sa niagi pang semana, nganong wa na man lang konsultaha di lang ang mga negosyante kon dili apil nang local government units aron nga mas tin-aw nang mga lagda sa wa pa mapahibawo?
* * *
Klarong wa tuohi sa IATF ang pasalig sa mosunod nga mga opisyal:
Si Presidential Assistant Mike Dino nga nipasalig nga Cebu City ang labing andam sa Covid-19;
Si Regional Development Council Chairman Kenneth Cobonpue ug DOH 7 Regional Director Jaime Bernadas nga nipasalig nga daghan pang bakanteng ICU beds ug ventilators alang sa mga pasyente sa Covid-19; ug
Cebu City Mayor Edgar Labella nga nipasalig nga bilib ang IATF sa iyang pagduma sa nisulbong nga mga kaso.
* * *
Angayng pasalamatan ang mga espesyalista ug mga tagduma sa mga tambalanan sa Sugbo sa ilang kaisog sa pagbarog ug pagpahibawo nilang Chief Implementer Carlito Galvez ug kaubanan sa IATF nga niduaw sa Sugbo sa niaging semana nga naapsan nang kapasidad sa mga tambalanan sa pagdaghan sa pasyente sa COVID-19 nga seryoso nang kahimtang ug naglisod na pagginhawa.
Hinaut nga makumbinser sab nilang surveillance team nga ipada ni Health Secretary Francisco Duque sa Sugbo karong adlawa nga sayop ang kasayoran nga gisabwag nilang Bernadas ug kaubanan aron nga maumol ang mas tukma nga mga lagda pagbadlong sa COVID-19.
* * *