Samtang ang ubang mga lugar sa Pilipinas, sama sa Manila naghisgut na kabahin sa posibilidad nga pagpaubos nalang sa general community quarantine gikan sa enhanced community quarantine tungod sa pagkubos na sa gidaghanon sa mga natakboyan sa novel coronavirus disease (COVID-19), ang Cebu City daw layo-layo pa og latason tungod sa padayong pagsaka sa mga nataptan.
Sa mga uwahing gipagawas nga resulta sa mga swab testing sa Department of Health Region 7, ang Cebu City padayon ang pagsaka ang gidaghanon sa mga natakboyan sa maong sakit.
Gani sa bag-ohay lang nga bulletin sa nasudnong ahensiya sa DOH, ang Cebu City na maoy nag-una sa tanang mga dagkong siyudad sa Pilipinas sa kaso sa COVID-19 human niini nalabwan ang Quezon City.
Niadtong una, ang Bo. Luz lang ang dunay daghang kaso, nakontrol kini pinaagi sa lockdown, nisunod ang Labangon ug sama sa gihapon nakontrol sab pinaagi sa lockdown, dayon nisunod ang Suba, Inayawan ug karong bag-o, ang Carreta nga adunay 45 na ka mga kaso base sa Mayo 10 nga talaan. Kun giunsa pagtabok-tabok aning virus gikan sa mga barangay ngadto sa laing barangay, maoy wala pa gyud masayod ang tanan mao nga importante kaayo ang contact-tracing.
Ang gibuhat karon sa mga barangay aron maprotektahan ang ilang dapit mao ang pagpatuman og higpit nga pagbantay sa ilang mga utlanan, apan usahay ang mismong mga residente maoy magpasagad ug magpasulod gihapon og mga dili taga ilaha.
Ang ingon niini nga sitwasyon nga diin-diin nalang nga barangay motumaw ang mga kaso, makapabalaka gyud sa mga tawong nagtinarong pagtuman sa quarantine protocols. Ang pagpangusog sa tulo ka siyudad sa Cebu City, Mandaue City ug Lapu-Lapu City sa Project Balik-Buhay pinaagi mass testing mao lang ang bugtong paagi aron makita dayon ang kinatibuk-ang hulagway kun unsa kalapad ang natakboyan na sa COVID-19.
Apan kun ingon niini nga wala kaayo mokooperar ang katawhan sa mass testing ug daghan gihapon ang wala mosunod sa protocols, bisan unsaon pa ang mass testing madugay-dugay pa gyud kining ECQ.