Iisang dagat

Kini kunohay nga music video nga gipakatap agig pagpakita sa solidarity tali sa Pilipinas ug Tsina ning panahon sa pandemonyo. Sa pagtuo nga makahatag kini og kaikag sa masigkahabig nga mopadayag sa suporta ang nahitabo nga mao nga mas daghan ang wala makauyon ning maong music video.

Niapil pa gani niini ang nabantog kanhi nga si Imelda Papin. Apan daghan sa mga tawo ang wala makauyon ning maong music video kini tungod kay dili mahitabo nga ang giisip nga atoa ang mahimong gamiton lang pud sa uban. Padayon gihapong gihasi ang matag Pilipino sa paghigmata nga ang tanan anaa ra sa kontrol. Apan bisan pag unsaon dili mahitabo nga managsama ang mga lobo ingon man ang mga karnero.

Gani matud pa ni Imelda Papin, iyang gihunahuna nga kining maong awit magdala og kahiusahan sa tanan apan ang pangutana mao nganong nahimong nakahatag kini og inspirasyon sa mga frontliners? Unsay kalambigitan sa dagat ug sa Coronavirus Disease?

Ang uban nagkanayon nga kini usa ka dakong propaganda nga psychological conditioning sanglit kabahin man sa pamaagi sa komunismo ang indoctrination. Gi-indoctrinate na ba ang kadaghanan aron daw mga itoy na lang nga mosunod sa kabubut-on sa mga tag-iya niini? Senyales na ba kini nga ang tanan himoong mosimba sa mga nagpaka dios dinhi sa yuta?

Natural nga masuko gyud ang kadaghanan. Kini tungod kay dili lalim alang sa usa ka banay o nasud labina kun unayon ka lang sa imong kaugalingong katagilungsod. Ning maong kapasikaran padayong mawad-an og umoy ang kadaghanan kay bisan ang giisip mong suod mamahimogn maoy mounay kanimo ug mobaligya nimo ngadto sa kaaway.

Kun ang imong bahandi nga mao ang imong teritoryo nahimong angkonon na lang sa uban mao man nuon ang hinungdan sa dakong kagubot sa umaabot.

Lisud ning mga panahona karon. Kay seguro ko nga dili pa gyud mahuman kining maong pandemonyo kay bisan gani ang giingong bakuna ug tambal usa naman ka dakong isyu ning mga panahona karon.

Asa kaha ta padulong? Basin ma extend na pud ang quarantine, matag kinse ka adlaw aron sa  hinayhinay madawat sa kadaghanan nga ang Enhanced Community Quarantine mao na lang normal sa atong kinabuhi.

Ug kun mamahimong limitado na ang pagpapdayag sa imong panahom nan, seguro ko padulong na kita sa Mount Doom sa kalibotan ni Rollo Tolkien’s Lord of the Rings kay kita mismo padayong gihasi ni Sauron nga kuyog nato karon.