Panahon ning krisis sa COVID-19, ang pagtinabangay usa sa mga yawe aron makasugakod ang katawhan. Apan unsaon man pagsugakod kun dunay pipila nga naghimo og dili makatawhanong buhat ngadto sa mga nagkinahanglan?
Didto sa kaulohan, adunay mga alegasyong nga adunay mga tambalanang nibalibad pagdawat sa pasyente bisan paman og tabangunon na kini. Seryuso kini nga alegasyon nga kinahanglang mahunong na.
Mao nga si Presidente Rodrigo Duterte kagahapong adlawa mibahad nga iyang pasirad-an ug suspensohon alang sa imbestigasyon ang mga kawani sa maong mga tambalanan.
Nunot sa COVID-19 pandemic, dunay gipatumang mga lagda ang mga nagkadaiyang tambalanan nga karon lang mga panahona gibuhat.
Usa niini kining pagdili sa mga tawo nga magpundok sa ilang pasilidad ug kutob sa mahimo di lang sila mo-admit og mga pasyenteng nga mahimo rang sa balay atimanon ilabi na kun dili emergency cases.
Maayo ang tumong niini kay aron mamenosan ang gidaghanon sa mga tawong ma-expose na hinuon sa maong virus samtang nagpaabot sa ilang mga diagnosis sa sakit.
Apan sumala pa sa mga mireklamo didto sa kaulohan, gibalibaran usab bisan kadtong mga pasyenteng tabangonon.
Konektado man sa COVID-19 o dili, ang pasyente kinahanglang atimanon kay mao kini ang kaakohan sa mga hospital. Ang mga tawong midangop sa tambalanan tungod kay wala nay laing kapaingnan aron mahatagan og alibyo o kaayohan ang ilang balatian.
Kun masuspenso kadtong mga medical personnel alang sa imbestigasyon, mag-unsa naman lang kadtong mga pasyenteng ilang giatiman ug kadtong mga pasyente sa COVID-19 nga naa karon sa ilang mga pasilidad?
Ang mga tambalanan ug ang ilang mga staff mao ang sinaligan karon batok sa COVID-19 ug dili usab maayong karong mga panahona nga gikonsiderar sila nga mga frontliners alang sa kaluwasan sa publiko apan mabutang sa ingon niini nga mga eskandalo.
Karong panahona mas importante ang patinabangay ug kini makab-ot lang kun magkasinabtanay ang tanan. Posibleng miscommunication lang ang tanan.