Aduna koy parokyano nga nitunol sa iyang hinabang alang sa parokya. Ako siyang giingnan nga lisud pa ba ron mam. Igo siyang nipahiyom dungan ang pag-ingon, kitang tanan karon nagkalisud apan dili kini babag aron kita mamhimong magmanggihatagon.
Stressful kaayo ang kinabuhi karong mga panahona. Tay-og dili lang ang atong lawasnong kahimtang apil na ang ekonomiya ingon man ang espirituhanong kinabuhi sa matag usa kanato. Nakita nato nga daghan karon ang nahimong haguka tungod ning maong hitaboa.
Subo palandungon nga didto sa Italya ingon man sa Britaniya dunay duha ka mga nurses nga nihukom na lang nga ilang taposon ang ilang kinabuhi kay gawas nga nakakita sila sa mga panghitabo sama sa nangamatay adlaw-adlaw sila mismo nahimong biktima sa kapintas ni coronavirus. Ang usa didto sa Britaniya tungod sa iyang dakong kamingaw sa iyang pamilya. Ang sa Italya gibati niya ang kahadlok nga siya mismo makatakod unya mao nga siya nagpakamatay na lang.
Sakit kining hitaboa kun buot hunahunaon. Daghanan nato dinhi ang nag-panic buying ug uban pa sa dihang nahitabo kining maong krisis ang nahimong aborido ug malisud alang kanila ang kalangay sa proseso. Samtang ang mga anaa sa gahum, hinuon dili tanan, ang nag abusar. Gipasaylo pa samtang ang uban nga gikan man unta sa panggubatan sa natad sa medisina apan nag-backride lang ang gidakop og gipabayad og P5,000! Asa man tuod ang hustisya ning kalakiha?
Sa akong kahimtang karon, padayong naglihok ang akong hunahuna aron akong mahimo ang sibo ug angayan aron ako makatabang usab sa panginahanglan sa uban. Limitado man tuod ang pondo ingon man ang kakuhaan, apan kun mahimo lamang kitang creative taliwala ning maong katalagman, kay human sa kangitngit anaa man gyud ang kahayag.
Ingon nga pangulo dili maayo nga ipadayag o ipakita ko ang akong kahuyang ug kalisang ning maong hitaboa. Kinahanglang anaa ang kalig-on ingon man ang internal nga kalinaw aron sa ingon makahatag ako og inspirasyon ug kadasig sa uban taliwala ning maong hitabo.
Padayon ako sa pag-ampo, padayon sa pagsakripisyo alang sa atong mga kaigsuonan ug kanatong tanan nga naapektuhan ning maong virus. Laban lang, matud pa sa kadaghanan.