Itlog, saging ug?

(Unang Gula)

Di pa lang dugay nahtabo ang panic buying sa mga saging bisan diin. Kini tungod kay matud pa sa ilang nakalap nga mga impormasyon ang saging kuno tambal sa coronavirus. Apan sunod adlaw tingali kadtong mga tawhana nga nag panic buying og saging namalit na pud to og hinog kapayas. Sayud namo

kun ngano. Kagahapon lang gyud napuno sa mga posts nga sama niini:

“Hi guys naa lang koy i-share must read para ni nato tanan:”

“Ang igsuon sa akong tito nitawag karon lang, nanganak ang ilang silingan sa Canduman today ug naay himala nga nahitabo. Paggawas sa bata nga bag-ong panganak nibarog diritso ang bata ug niistorya: ‘Kamong tanan tawo pangaon mo og itlog karon adlawa.’ Pagkahuman istorya sa bata kalit kini nahagba ug namatay. Dili ni siya scam o fake news. Maybe mao na ni sign ug sugo to sa Ginoo para makaluwas nata niining atong kahimtang karon sa Covid 19 Spread this to everyone guys, don’t forget to pray always and keep safe!”

Gani duna pay uban nga nidasig nga buhaton na lang gyud ni nato o tumanon ni nato total walay mawala nato. Hinuon, nakasabot ta kun nganong dunay  mga tawo nga sama niini. Mahimong ila kining gihimo una tungod kay basin ang nagpasiugda niini mamaligyaay og itlog. Ang mga tawo nga motuo magpanic buying og itlog. Gani sa ubang posts giklaro man gani nga yellow lang kuno ang kaunon dili ang puti.

Ikaduha, ang tawo nga naghimo sa ingon sama nato nangindahay nga unta dunay something extraordinary nga mahitabo taliwala ning atong stressful nga kahimtang karon. Ngano man? Tungod kay ang tawo maglisud og paabot sa resulta labina kun kini nagbagood sama sa bao. Kay lagi ang tawo buot og paspas. Apan sa panahon karon, dili mahimong mapaspas labina kun kitang mga hingtungdan magdumili sa pagbulig sa gihan-ay nga sistema.

Sa laing bahin, nahimong dunay mass hysteria ning kalakiha ug emotion contagion labina kun dili makontrol ang mga tawo labina kun pamilya na ang hisgotan. Daghang mga tawo ang mawala sa hustong hunahuna ug buot labina kun pamilya na ang hisgotan.

Makalilisang ang nahitabong taas nga linya sa atong mga terminal alang sa aminahan ug habagatang Sugbo. Nawala ang social distancing, ug daghan ang pursigido nga mouli. Kun simbako dunay pipila sa nilinya nga mga COVID-19 carrier, nan, mahimong matakdan ang kadaghanan ug ang si bisan kinsang natakdan manakod pud sa ilang kabanayan. Kay bisan pag unsaon pag-awhag nga mag self-quarantine kun ang balay mismo way tagsa tagsa ka mga lawak tungod kay halos tanan magsinardinas lang, unsay imong mapaabot? Unta  sa maong kahimtang mahimong buhaton kining mosunod: (Padayonon)