Bugtong konsuylo sa kalibog natong mga molupyo sa mga lagda sa community quarantine sa Metro Manila (nga gitawag ni Presidente Rodrigo Duterte nga lockdown) ug sa enhanced community quarantine sa Luzon (nga gitawag sab niyang lockdown) mao nga naglibog na sang lokal nga mga opisyal:
• Niadtong Lunes, Marso 16, niingon ang presidente nga bahala nang lokal nga mga opisyal unsaon pagpanalipod ang mga molupyo; apan
• Sa alas-2 sa kaadlawon gahapon, Biyernes, Marso 20, gipasidan-an sa presidente ang lokal nga mga opisyal sa di pagbuut-buot, angayng mosunod lang sa nasudnong gobyerno.
* * *
Bugtong gihisgutan sa presidente nga kalapasan sa lokal nga mga opisyal nga wa niya ilha maong pagbabag sa mga kargamento nga wa niya i-detalye sa mga dapit nga wa niya nganli.
Gidudahan nga ang puntirya maong mga mayor sa Metro Manila nga nisulbong ang popularidad tungod sa ilang paningkamot paghimong mas sayon sa kinabuhi sa mga molupyong naigo sa lockdown.
Apan sama sa nangagi niyang mga mensahe sa Covid-19, kalibogan ang labing uwahing sulti sa presidente, apil nang lisod sabton nganong giluwatan sa taknda nga nangatug nang kinabag-an sa katawhan.
* * *
Usa sa labing kalibogan sa iyang gideklarar nga lockdown mao ang lagda sa pag-apud-apod sa mga pagkaon ngadto sa mga molupyo nga mahimong magutman:
• Giawhag niya si Social Welfare Secretary Rolando Bautista sa paggamit sa mga trak sa gobyerno pagpanghatag og bugas; ug
• Gisugo niyang mga barangay kapitan paglili sa mga molupyo nga wa nay gikaon, uban ang hulga nga ikiha kun di motuman sa ilang trabaho.
* * *
Nataligam-an sa presidente pag-apil sa lagda asa kuhaon ang pundo sa pagpakaon og pamahaw, paniudto ug panihapon matag adlaw sud sa 30 ka adlaw sa minilyon sa labing kabos nga mga molupyo sa Luzon nga wa nang katrabaho kay wa na pagawasa sa mga pinuy-anan.
Maong ang Quezon City nipakaon sa 400,000 ka pamilya, ang Makati nipakaon sa 80,000 ka tinun-an, ang Cebu City manghatag og 100,000 ka sakong bugas humay, ang ubang local government units mamaligya og baratong bugas ug ang DSWD namutos og family packs apan wa pa manghatag.
Ang kahaw-ang sa nasudnong liderato, nga nisangpot sa iyahay, di matapakan sa panghudlat.
* * *