Duna gihapoy mga tawo nga hangtud karon wala kasabot kun unsa ka seryoso kining hulga sa novel coronavirus (COVID-19) gumikan kay ang uban adunay gana pang kwestyunon ang gipatumang protocols sa gobiyerno.
Kini human pipila ka mga motorista, mga vendors sa kadalanan ang nangreklamo kay nahasol sa gipatumang mga thermal check, curfew ug uban pa.
Kung buot hunahunaon, kining mga tawong wala magpakabana mao ra usab kadtong mga tawong dili magbalebale bisan nalang pagpaminaw o pagbasa sa mga balita. Sila pa kadtong dili manginlabot sa palibot sila pa sab karon ang nagbutang sa uban sa peligro.
Ang COVID-19 gikonsiderar na sa World Health Organization nga gloal pandemic tungod kay sa 195 ka nasud sa kalibotan, 145 ang natakboyan na sa maong virus nga gikan sa Wuhan City sa China.
Kada adlaw adunay gatosan ka mga tawo sagad mga tiguwang ang nangamatay sa maong sakit gikan sa nagkalain-laing mga nasud.
Angay timan-an nga bisan gani ang mga adunahan ug modernong mga nasud nakatala og mas daghang kaso ug nangamatay kun itandi sa Pilipinas.
Mao nga way gipili ang maong sakit bisan kun adunahan, kabus, edaran o batan-on basta magpasagad ug dili motuman sa mga gipatumang protocol, kandidato gyud ug humok kaayong mataptan niini.
Ug aron nga mapugngan ang paspas nga pagkatap niini, gimando kagahapong adlawa ni Pres. Duterte nga ipaubos sa state of calamity ang tibuok Pilipinas samtang gipatuman ang enhanced community quarantine sa Luzon.
Mahinungdanon kaayo nga sundon ang kamandoan ilabi na ang pagpatuman sa social distancing tungod kay pinaagi sa pinisik sa laway o uban pang likido gikan sa nagdala sa virus makatakod na kini.
Gamay lang nga sakripisyo sud sa usa ka buwan dako na og tsansang mapapas kining maong virus kay wala naman unya kini mabalhinan.
Dili unta balewalaon sa uban ang mga gipatumang protocol sa gobiyerno tungod kay dili lamang kini para sa pipila kondili para kini sa tanang Pilipino.