Kung kampanya batok sa illegal nga drugas, nabaniog na gyud ang ngalan ni Police Lt. Col. Jovie Espenido kinsa nabantog sa pagpuhag sa mga dagkong sindikato sa illegal drugs.
Sama nalang ni anhi Albuera, Leyte Mayor Rolando Espinosa nga namatay sa police operation sulod sa Baybay City Sub-Provincial Jail. Sa wala pa namatay si Espinosa, si Espenido maoy nangulo sa pagdakop sa maong mayor gumikan sa illegal nga druga.
Ang gikaintapan nga drug syndicate sa Mindanao nga Parojinog napayhag usab sa kamot ni Espenido nga maoy napalasamot og humot sa iyang pangalan tungod sa walay kukahadlok sa paggukod sa mga durugista nunot sa kamandoan sa administrasyon.
Gani naay mayor nga mi-resign human masayri nga idestino si Espenido sa ilang dapit kay mahadlok mamatay sanglit nalambigit siya sa illegal drugs.
Dali ra kaayo usab ang pagsaka sa ranggo ni Espenido tungod sa iyang mga kalamposan nga gidestino siya sa mga dagkong dapit nga haum lang sa mga dagkong opisyal.
Dili ikalimod nga kon naay nidayeg, naa usay nangasuya kinsa nangaligsan tungod kay sila natabonan sa pagsidlak ni Espenido maong dili ikahibulong nga ilambigit iyang ngalan sa drugs aron maguba ang imahen.
Karon naapil ang ngalan ni Espenido sa narcolist sa presidente apan mismo si Pangulong Duterte dili motuo nga nalambigit kini sa illegal drugs.
Kaniadto ra diay ni sa tuig 2016 nalakip sa listahan ang ngalan niya apan nalimpyohan diin naa siyay exclusion sa tuig 2017.
Apan nganong mitumaw naman sad karon? kinsa man ang nagmaniubra niini kon naa man?
Dakong posibilidad nga gibaslan siya sa mga naligsan ma kauban man o kaaway sa ilang krusada.
Matud ni Espenido nga dunay politika sa grupo diin siya nahisakop nga gustong moguba sa iyang pagkatawo apan masaligon siya nga ang pulong sa presidente maoy naglimpyo kaniya, labaw sa tanan ang Ginoo ang iyang gisaligan.
Kon duna kunoy mahitabo kaniya, ang gobiyerno ang pangitaan, matud ni Espenido.