ENERO 12, 2020: Piyesta sa pagbunyag sa atong Ginoo
Mga Pagbasa: Is. 42; 1-4,6-7/Sal. 29/
Buh. 10;34-38/Mt. 3;13-17
Niadtong bata pa kuno ko natetanus ko sa pusod. Mao nga nahitabo ang emergency baptism alang kanako. Ang nagbunyag kanako usa ka madre nga Dominikana ug ang ninang nako usa ka nars kang kansang apelyido mao ang Roa. Ambot asa na kaha to sila apan sa gihapon mapasalamaton ko nila gumikan sa ilang pagkamanggihatagon sa kaugalingon alang kanako nga niadtong panahona usa ka dakong himatyon. Ang una kunong nitubo sa akong mga ngipon mao man ang akong mga bangkil bantog ra tingali nga hangtud karon kusog gihapon kong mopag-it.
Ang bunyag matud pa sa pagtulon-an sa atong simbahan mao man ang pagpasakop nato sa mas pormal nga paagi sa atong katilingbang Kristohanon. Sulod sa hataas nga katuigan dunay evolution nga nahitabo ning maong sakramento. Kaniadto dagko ang bunyagan ug gani mga tulo ka tuig pa gyud ang pagpangandam! Nga sa ato pa, dili sayon ug lalim ang magpabunyag kaniadto. Mao nga seryoso gyud ang mga unang Kristiyanos sa pagpanalipod sa pagtuo. Dili sama karon nga tungod kay mubo na lang ang higayon sa pagpangandam ug gani nahimong kabahin na lamang sa naandang routine mao nga daghang mga binunyagan ang ni take for granted lang sa ilang pagka binunyagan.
Si Jesus nga walay sala gibunyagan ni Juan. Sa maong bunyag si Jesus niambit sa atong pagkatawhanon aron kita makaambit pud sa iyang pagka Diosnon. Kining maong pag-inambitay nakapahimo sa Kinabuhing Kristiyano ingon nga Relasyon ug dili lang Relihiyon. Kun ang relihiyon maoy nagdala og han-ay sa atong kinabuhing espirituhanon ug katilingbanon ang maong kalambigitan usab maoy nagdala og bulok sa atong pakigkukabildo sa atong isigkaingon matag adlaw. Nga sa ato pa, kita mailhan nga mga binunyagan pinaagi sa atong mga binuhatan. Unta diha sa atong pagka binunyagan atong bansayon ang:
A. Pagkapari diha sa makanunayong pag-ampo alang sa uban.
B. Pagka propeta pinaagi sa atong pagsabwag ug unsay maayo ug matuod dili ang bakak ug binuang.
C. Pagka Hari diha sa atong pagpangalagad alang sa kaayohan sa kadaghanan. Ning paagiha nahimong mas bililhon ang atong pagkabinunyagan dili lamang kay bunga sa bisan unsa nga giisip natong naandan.
Isalikway unta nato ang sala aron mamahimo kitang mga anak sa Dios, isalikway unta nato ang pagdani sa dautan ug pagpaulipon sa sala ug labaw sa tanan isalikway unta nato si Satanas amahan sa sala ug prinsipe sa kangitngitan! ug tuohan nato ang Dios labaw sa tanan.