Dili makatarunganon nga tanyag

Ambot kun mosaler ba kaha kining desisyon sa kagamhanan sa probinsiya sa Sugbo pag-hire mismo og job order nga mga doktor alang sa mga hospital nga gipadagan niini sa nagkalain-laing lungsod ug dakbayan sa lalawigan.

Sulod sa pipila ka bulan, wala gayud ni usa ka doktor nga mi-apply sa LBP Service Corporation, ang manpower agency nga gikontrata sa Kapitolyo pagkuha og mga medical personnel alang sa mga district ug provincial hospital.

Mao nga nakahukom na lamang si Gobernadora Gwendolyn Garcia nga mismo ang Kapitolyo na lamang ang mo-hire og mga doktor.

Hinuon pulos lamang mga job order kining mga doktor nga kuhaon sa gobiyerno sa probinsiya.

Hinuon sukwahi kini sa mga palisiya sa nakalabay nga administrasyon ni Hilario Davide III diin ang kapitolyo mismo ang mo-hire og mga doktor ug ubang medical personnel ilalum payroll sa kagamhanan sa lalawigan.

Apan niining dinaliang lakang sa administrasyon ni Garcia, dakong pangutana karon kun aduna bay mga doktor nga mokubit sa offer sa Kapitolyo ug mo-apply ilalum sa sistema sa JO. Well, ato lamang atangan.

Kun akoy doktor, dili nako hagoon ang akong kaugalingon pagdaro sa grabeng trabaho sulod sa mga district ug provincial hospital kun JO man lamang ang akong status.

Dili gayud kana makatarunganon nga offer. Dili ko matingala kun walay mokubit nga mga doktor sa offer sa Kapitolyo. Hinuon kun adunay mo-apply, mas labing maayo.

Apan siguro kadtong modumili pag-apply makaingon nga dakong insulto sa ilang propesyon nga sulod sa napulo ka tuig nilang gitun-an.    

Nganong dili man lang magmugna og permanente nga item ang Kapitolyo alang sa mga doktor sa mga district ug provincial hospital?

Kini tungod ba kay mas gasto sa panudlanan ang pag-hire og mga regular staff?          

Angay nga hunahunaon sa kagamhanan sa probinsiya nga dakong bintaha kun himuong permanente ang mga doktor nga i-hire niini.

Kini aron sa ingon nga mas mapakusog pa ang medical services sa mga hospital nga gidumala niini.

Dili na lang unta nato hunahunaon ang dakong gasto sa sweldo sa mga doktor kun regular ang ilang posisyon. Ang angay hunahunaon mao ang maayong serbisyo ngadto sa katawhan gikan sa mga doktor nga adunay katagbawan usab sa ilang suweldo.