Nagsige og panghagad ang akong asawa nga iya kong palitan og bag-ong telepono alang sa Pasko. Hapit na gyod ko mada. Gamay na lang gyod og kuwang. Nakabalibad gyod hinuon ko. May gamay nga kahinugon apan mas nalipay kong nakalikay sa gasto nga wa kinahanglana.
Kay nalingaw pa sa karaan nakong telepono. Lima ka tuig na ni sa akong bulsa apan mapuslanon pa. May mga higayon nga mokaging na. Apan matag higayon maulian ra. Bisan mas dali na nga mahurot ang bateriya, makatiwas pa gihapon sa naandan nakong mga gimbuhaton.
* * *
Ang kahinog sa pangedaron nakatudlo nako sa kalainan sa mga butang nga akong ganahan ug sa mga butang nga akong gikinahanglan. Ug sama sa ubang butang, ang akong gana pag-angkon sa bag-ong mga telepono nalabwan sa giapas nga kapuslanan.
Ang mosunod nakong gikinahanglan natagbaw pa sa karaang telepono: Maka-text, makatawag, maka-surf sa internet, makapaminaw sa akong audiobooks ug na-download nga tanang albums sa Beatles, maka-upload og video ug mga hulagway sa social media, makapaminaw sa mga sibya sa radyo ug podcasts ug makasuwat og lindog ug maka-record og mga komentaryo.
* * *
May higayon hinuon nga nikamang ang akong telepono. Siyam-siyaman una makaabli og web page. May mga higayon sang niinit ug dali rang nipid-ok ang bateriya. May mga higayon sang di kasumpay sa router ug bluetooth.
Nasulbad ang kasagaran sa kahasol pinaagi sa pagpawong ug pagpaandar pagbalik sa telepono. Sa usa o duha ka higayon nga wa maulii, akong gi-reset ug nibalik ra dayon sa naandan nga lihok.
* * *
Ambot unsay gama sa akong karaang telepono sa bag-ong tuig. Masaligon ko nga magpabilin siyang payter. Maong motambag ko nga sunod nimong palit og telepono, gawas sa pagkuha sa mga may labing abante nga software susihon sab ang kalidad sa hardware. May telepono ko nga kinaunahan nga makakuha sa software updates apan human lang sa usa ka tuig nikang-a na.
Lahi sa akong telepono karon nga bisan kapila na nahagbong porma gihapon. Laing alas mao nga bisan sa akong kakurog mas maayong mokuha og video ug hulagway. Labaw sa tanan, ug mao ni labing ampay namong mga tihik, wa koy gasto kay hinatag ni.