Dako ang tentasyon sa pagpahiyos sa hulga sa bagyong Ursula. Kay nagsunod siya sa low pressure area (LPA) nga labihang mabawa, nakabubo og uwan apan wa hatagi og bisan gamayng kahigayonan nga mahimong bagyo.
Gani nahilis ra duol sa Davao nga wa ganing kasaka paingon sa Kabisay-an.
Maong ang nisunod nga LPA wa hatagi og igong importansiya. Bisan nipasidaan ang PAGASA nga dako ang kahigayonan nga mahimong bagyo, di ingon ana kakusog ang hangin.
Gawas pa, lisod ilugon ang atensiyon sa katawhan gikan sa kahinam sa nag-ung-ong nga taas nga bakasyon sa Pasko ug bag-ong tuig.
* * *
Ang abundang pasidaan sa PAGASA ni Ursula gisugat sa naandang mga pagduda (daghang salamat sa mas abundang mga sipyat sa buhatan). Kasagaran nagdumili pag-usab sa mga plano pagbiyahe sa kadagatan bisan sa kahigayonang magakotan nang mga barko sa Lunes sa hapon.
Dihang gisugdan pag-isa ang Signal No. 1, nagkabulingit ang PAGASA sa mga protesta nga labihan pang inita, malinawon pang kadagatan, hinay pang hangin ug wa kinahanglanang pagkatanggong sa mga pantalan sa mga pasahero ug kargamento.
* * *
Nagkakusog si Ursula samtang nagkaduol sa yuta ug kay abunda mang kadagatan sa iyang agianan nagpabiling gikusgon bisan kapito nitugpa, katulo sa bisperas ug kaupat sa adlaw sa Pasko:
Sa Salcedo, Eastern Samar sa alas-4:45 sa hapon; sa Tacloban City, Leyte sa alas-7:30 sa gabii; ug sa Cabucgayan, Biliran sa alas-9:15 sa gabii niadtong Disyembre 24; sa Gigantes Islands, Carles, Iloilo sa alas-2:30 sa kadlawon; sa Ibajay, Aklan sa alas-8:40 sa buntag; sa Semirara Island, Caluya, Antique sa ala-una sa hapon; ug sa Bulalacao, Oriental Mindoro sa alas-3 sa hapon niadtong Disyembre 25.
* * *
Ang kadaghan sa kabalayan ug ubang istruktura nga gigusbat ni Ursula, puno sa mas lapad nga kadaot sa sunudsunod nga mga linog sa Mindanao, angayng makapugwat na sa kadagkoan sa gobyerno sa pagbag-o sa karaang National Building Code ug hingpit nang pagpatuman sa mas higpit nga mga lagda.
Ang pait nga talan-awon nga pipila sa mga biktima nahimutang gihapon sa kabaybayonan ug ubang giisip nga danger zones nagmatuod nga wa pa gyod diay ta maleksiyon sa kapintas sa bagyong Yolanda unom ka tuig nang nilabay.
* * *