Isip kabahin sa kampanya sa Department of Health alang sa maayong panglawas, gilaraw sa ahensiya ang pagpatuman og “sin tax” kon taas nga buhis alang sa mga parat nga pagkaon.
Si DOH Undersecretary Eric Domingo mipasabot nga paagi ni aron malikayan ang sakit nga hypertension.
Kun molampos ang maong plano mas mahal na unya ang presyo sa buwad. Ug kun atong undayonan ang argumento sa DOH, posibling lakip ang ginamos momahal sab ang presyo. Maayo ang tumong sa DOH kun tinuod nga ang nag-unang katuyoan sa pagbuhat niini mao ang pagpugong sa sakit.
Apan ang problema kay mas misiwil ang tinuod nga motibo sa plano nga mao ang pagkolekta og dugang buhis aron magamit pagpatuman sa Universal Health Care Law.
Kun adto lang gihapon kuhaon sa gobyerno sa mga kabus ang pundo nga gamiton pagpatuman sa maong balaud, tabla ra nga gigisa ang mga probre sa kaugalingon nilang mantika.
Ang pagpatuman og “sin tax” sa mga parat nga pagkaon sama sa buwad maisip nga kalbaryo sa mga kabus. Ang prinsipyo sa pagpatuman sa maong matang sa buhis mao nga ipahamtang ni sa maisip nga luho nga produkto.
Tingali alang sa mga adunahan nga naanad og mahalon nga karne matag-adlaw, luho na alang nila ang pagkaon og buwad.
Apan alang sa mga kabus nga buwad ug ginamos ang sud-an matag-adlaw, dili makiangayon ang maong plano.
Kun karon maglisud na gani intawn pagpalit og bisan tunga sa kilong buwad ang kadaghanang kabus, mosamot nga dili na gyud sila makapalit og sud-an.
Kun dili na makapalit og buwad, mas dako ang problema sa DOH sa panglawas sa mga kabus tungod kay siguradong daghan ang magdildil nalang og asin.
Di kasabot si Domingo niini tungod kay siguradong wala siya makasuway nga maglanlan og kan-on samtang nagtuslob og asin.
Ang maayong buhaton sa mga opisyal sa DOH mao nga suwayan nila og puyo uban sa mga kabus aron ilang masayran nga ang pagsud-an og buwad dili ni luho alang nila.
Ang pagpahamtang og taas nga buhis sa ilang pagkaon dili pagtabang sa mga kabus kun dili pagpitlok nila.