Drugas walay hubas hubas

Mokapin na sa P100 milyones nga kantidad sa shabu ang nasakmit sa kapolisan sa dakbayan sa Sugbo. Kini sulod lang sa 49 ka adlaw o sukad milingkod ang bag-ong pangulo sa Cebu City Police Office Col. Gemma Vinluan.

Subsob ang mga anti-drug operations sa tanang units sa kapolisan sa nagkadaiyang mga area of jurisdiction.

Apan taliwala sa hugot nga anti- drug campaign nganong dili man gyud mohubas ang drugas?

Gani kinilo na ang masakmit sa mga pulis karon dili na mga ordinaryong pakete o ginagmay lang.

Matud sa hepe sa kapolisan sa dakbayan nga base sa ilang nadawat nga taho gikan sa bilanggoan ang supply sa shabu.

Dili na kini bag-o pa kay didto lang gani sa kaulohan nangadato naman ang mga binilanggo tungod sa illegal drugs trading.

Dako ang posibilidad nga tinuod kini ang pangagpas ni Col. Vinluan nga sulod sa prisohan nag gikan ang illegal drugs.

Nan, ang pangutana unsaon man sa pagsanta sa pagkuyanap sa illegal drugs?

Dinhi na mosulod ang partisipasyon sa katawhan o sa tibook komunidad nga manginlabot ug magpakabana aron masolbad ang problema sa illegal nga drugas.

Sa pikas bahin, gipasabot sa kapolisan ug sa Philippine Drugs Enforcement Agency (PDEA) nga gikinahanglan pa nga mo-secure og court order ayha mahimong i-dispose o gub-on ang mga nasakmit nga shabu.

Ayha na kini ma-dispose kun nahuman na kini og gamit sa korte isip ebidensya sa kaso sa mga nalambigit.

Ang proseso mogamit sila og kahimanan sa cremation sa punerarya aron dali sunogon ang shabu.

Samtang dili pa kini sunogon gibutang  kini sa “secured storage” aron dili mahilabtan nunot sa mga katahap nga kini gi-recycle ra pud maong dili gyud kini mahubas.