Napugos ang Lapu-Lapu City Disaster Risk Reduction Management Council pagdeklarar ubos sa state of calamity sa mga isla sa Olango, Caohagan, Caubian, ug Pangan-an tungod sa pagkuwang sa suplay sa pagkaon, gasolina, ug medisina sa maong mga dapit.
Usa na kasemana nga way biyahe ang mga pump boat paingon sa mga isla gikan sa mainland sa Lapu-Lapu tungod sa dili maayong kahimtang sa panahon. Gidid-an sa Philippine Coast Guard ang mga pump boat nga mobiyahe hangtud nga malibkas na ang gale warning nga giluwatan sa Pagasa.
Sa talaan sa disaster office sa Lapu-Lapu mokabat og 2,189 ka mga pamilya gikan sa upat ka mga isla ang apektado.
Matud ni Nagiel Bañacia, pangulo sa Lapu-Lapu City Disaster Risk Reduction and Management Council, gikinahanglan ang deklarasyon sa calamity aron makakuha og pundo nga magamit pagtabang sa mga apektado.
Ang deklarasyon hinuon nagkinahanglan pa og confirmation gikan sa Lapu-Lapu City Council. Kagahapon hinuon duna nay suplay sa pagkaon ug mga medisina nga nahatud didto sa isla sa Olango gamit ang chopper sa Philippine Air Force ug barko sa PCG.
Si Mayor Ahong Chan maoy nangunay paghatud sa suplay ug paghakot sa masakiton gikan sa isla paingon sa dakbayan sa Lapu-Lapu gamit ang helicopter.
Hinaut nakapukaw sa mga opisyal sa gobyerno ang sitwasyon sa mga isla sa nilabay’ng semana. Tingali panahon na nga tun-an sa mga opisyal sa dakbayan sa Lapu-Lapu ang pagdugtong sa maong mga isla paingon sa mainland pinaagi sa taytayan.
Luoy intawn ang mga taga-isla matag-higayon nga dunay kulyada ug dili maayo ang kahimtang sa panahon tungod kay dili sila makatabok paingon sa Mactan. Daghan sa mga trabahante ang napugos pag-absent sa trabaho ingon man mga estudyante wala makasulod sa ilang klase.
Dili man tingali imposible ang pagdugtong sa maong mga isla paingon sa Mactan. Ang paghimo sa ingon mas makapasamot pa paglambo sa turismo sa maong dapit. Kun mas dali ug sayon nga maabot ang Olango siguradong modagsa pa ang mga turista ug mapalambo ang panginabuhi sa mga molupyo sa maong dapit.