Trahedya sa kadagatan

Sa kadaghan na sa kalamidad sa kadagatan nga nahitabo dinhi sa Pilipinas, murag wala pa gayud kitang mga Pilipino makakat-on og dakong leksiyon gikan sa maong mga panghitabo nga mikalas na og liboan ka kinabuhi.

Sa niaging nga adlaw, maoy misugat kanato ang dakong balita kabahin sa nalunod nga tulo ka motorboat didto sa kadagatan sa Iloilo. Tungod sa mao nga insidente, subra sa 30 ka pasahero ug mga crew sa maong mga motorboat ang nangamatay.

Lakip sa mga biktima mga Sugboanon. Matud pa sa taho, pito ka molupyo gikan sa Barangay Ermita sa dakbayan sa Sugbo ang apil sa mga casualty. Hinuon misaad ang city government nga mohatag ug hinabang ngadto sa mga pamilya sa mga biktima.

Paggikan kuno sa maong mga barko didto sa Iloilo, maayo kuno ang panahon. Apan wala nila nasuta nga nag-alburoto na diay ang dagan sa panahon sa ubang lugar sa nasud gumikan sa hanging habagat ug low pressure area.

Mao nang pipila ka gutlo gikan sa ilang pagnabigar, nagbaguros ang kusog hangin nga maoy mipatikyaob sa tulo ka mga motorboat. Gawas niadtong nasalbar ug nakalas, adunay pipila ka pasahero ang missing hangtud karon.

Kinsay manubag sa maong trahedya? Mahibaw-an nato kini sa inbestigasyon unya sa otoridad. Hinuon, angay gayud iesplikar sa mga taga motorboat ngano milarga gayud ang maong mga sakyanan bisan pa sa naglabad nga panahon.

Kabahin sa kagamhanan, aduna bay pagtugot gikan sa otoridad ilabina na sa Philippine Coast Guard ang paglarga sa maong mga motorized banca? O basin baya kun milighot lamang ang maong mga sakyanan hinungdan sa maong trahedya.

Usa kini sa mga anggulo nga angay tutukan sa mga imbestigador. Ordinaryo na ang mga trahedya sa kadagatan. Apan mapugngan ba kining maong klase sa panghitabo? Siguro mapugngan lamang kun nakakat-on na og leksiyon ang tanan.