Niining pag-asumir ni Cebu City Vice Mayor Edgardo Labella isip bag-ong mayor sa dakbayan sa sunod nga bulan, makapaabot unya kitang mga molupyo og maayo nga relasyon tali sa iyang administrasyon ug sa kapolisan ning siyudad.
Daan nang mihandom si Brigadier General Debold Sinas, ang direktor sa Police Regional Office sa Central Visayas, nga magkauli na ang maayong relasyon tali sa kapolisan ug sa liderato sa City Hall nga grabe nga nagkagusbat karon.
Nasayod na kita nga maayong pagkahugno ang relasyon sa dakbayan ug sa kapolisan. Kini gumikan sa mga pasangil ni Mayor Tomas Osmeña nga ang kapolisan maoy nagpaluyo sa mga pagpatay dinhi sa siyudad ug sa probinsiya, ilabina niadtong mga suspetsado sa druga.
Gipasanginlan usab ni Osmeña ang kapolisan nga midapig sa kaatbang niini sa pulitika sa niaging eleksiyon. Matud niya nga daghan sa iyang mga suporter, ilabina didto sa kabukiran, ang gipang-harassed kuno sa mga pulis nga nagmaskara.
Karon nga mapupos na ang termino ni Osmeña ug mopuli na ang pamunoan ni Labella, angay lamang siguro nga mahibalik ang maayong relasyon tali sa dakbayan ug kapolisan. Dili angay nga magpadayon pa kining maong balana.
Angay lamang nga magkahiusa ang duha ka institusyon aron mapalambo pa ang kampanya alang sa kalinaw ug kahusay ning dakbayan. Hinuon, makapaabot kita nga mahilot ra kining maong balana ilalum unya sa administrasyon ni Labella. Dili nato ikalimod nga nagkinahanglan gayud og suporta ang kapolisan sa siyudad gikan sa lokal nga pangagamhanan sa ilang pagpalig-on sa ilang operasyon. Kini tungod kay kulang gayud ang budget alang kanila gikan sa national headquarters.
Dili usab nato ikalimod nga nagkinahanglan ang atong lokal nga pangagamhanan og usa ka police organization nga puno sa ekipo aron nga hapsay ang ilang operasyon pagpatunhay sa kalinaw ug kahusay sa dakbayan.
Human na ang eleksiyon ug angay nang maghiusa ang tanan alang sa kalamboan sa siyudad.
Alang sa libre ug layo sa kakuyaw nga dakbayan, wad-on na ang pamulitika ug angay nga magtinabangay sa pagbangon ang tanan.